Վերնիսաժի բարեկարգումը նախատեսում է նաեւ վաճառողների արտաքին տեսքի «բարեկարգում»

Արդեն նշել ենք, որ Երեւանի քաղաքապետարանում մի քանի օր է՝ քննարկումներ են ընթանում մայրաքաղաքի գլխավոր պողոտայի Վերնիսաժի հատվածի վերակառուցման եւ բարեկարգման ծրագրի շուրջ:

Այս անգամ հանդիպում-քննարկմանը հրավիրվել էին զբոսաշրջության ոլորտի ներկայացուցիչներ, մասնավորապես, էկոնոմիկայի նախարարության զբոսաշրջության վարչության պետ Մեխակ Ապրեսյանը, Հայաստանի ազգային մրցունակության հիմնադրամի տնօրեն Արման Խաչատրյանը, Հայաստանի ներգնա տուրօպերատորների միության ներկայացուցիչներ, Տուրիզմի հայկական ինստիտուտի ռեկտոր Ռոբերտ Մինասյանը եւ համայնքային թանգարանների տնօրեններ: Քաղաքապետի տեղակալ Դավիթ Օհանյանը նշել էր, որ վերջին տարիներին Երեւանի քաղաքապետարանը, ի դեմս մշակույթի եւ տուրիզմի վարչության, մայրաքաղաքում զբոսաշրջության զարգացման ուղղությամբ իր հստակ քաղաքականությունն ունի: «Առաջիկա մեր ծրագրերում Վերնիսաժի արդիականացումն այս առումով կարեւորագույն ծրագրերից մեկն է, որն, անշուշտ, կնպաստի նաև ոլորտի զարգացմանը»,- շեշետել էր նա:

Ինչպես մեզ տեղեկացրին քաղաքապետարանի հասարակայնության հետ կապերի վարչությունից, ներկաները կարեւորել են տարածքում արվեստանոցների ստեղծումը, որոնցում մայրաքաղաքի հյուրերը կկարողանան անձամբ, օրինակ՝ կավից որեւէ առարկա պատրաստել կամ էլ գորգագործությանը ծանոթանալ: Նրանց կողմից առաջարկվել է նաեւ միջոցառումների կազմակերպման համար առանձին փոքր հրապարակ-հարթակ ստեղծել շաբաթ-կիրակի, ինչպես նաեւ տոն օրերին ազգային, մշակութային միջոցառումներ կազմակերպելու նպատակով:

Հատկանշական է, որ զբոսաշրջության ոլորտի մասնագետներն անդրադարձել են նաեւ վաճառողների արտաքինի կանոնակարգման խնդրին, ինչպես նաեւ տարածքում զբոսաշրջիկների համար սանհանգույցներ կառուցելու անհրաժեշտությանը:

Քրիստինա Տեր-Մաթեւոսյան