Էրդողանը Թուրքիան վերածում է Մերձավոր Արևելքում անկայունության աղբյուրի. քուրդ պատգամավոր

Tert.am-ը գրում է.

Թուրքիայի նախագահ Ռեջեփ Թայիփ Էրդողանը խեղդում է խոսքի ազատությունն իր երկրում` բռնապետական կառավարություն ստեղծելու համար և դրանով իսկ դառնում է ապակայունացման աղբյուր Մերձավոր Արևելքում: ТАСС-ի փոխանցմամբ` The New York Times -ին տված հարցազրույցում նման կարծիք է հայտնել երկրի խորհրդարանի քուրդ պատգամավոր, Ազգերի ժողովրդավարություն քրդամետ կուսակցության համանախագահ Սելահաթին Դեմիրթաշը:

Վերջինիս խոսքով` Էրդողանը, ապրիլի սկզբին ԱՄՆ այցելելով, դժգոհել է ԱՄՆ-ի կողմից քրդերի դեմ աջակցության բացակայությունից:

«Որևէ մեկը պետք է Էրդողանին ասի, որ ինքը վերածվում է Մերձավոր Արևելքի համար ապակայունացման  աղբյուրի: Նա դադարեցրել է խաղաղ բանակցությունները Քուրդիստանի աշխատավորական կուսակցության հետ, անվտանգության ճնշող ծառայություններից կազմված պետություն է ստեղծում և ոտնահարում է այն ամենն, ինչ մնացել է թուրքական ժողովրդավարությունից», - ասել է Դեմիրթաշը:

Վերջինս մեղադրել է Եվրամիությանն ու ԱՄՆ-ին Անկարայի հակաքրդական քաղաքականությունը գիտակցաբար անտեսելու մեջ: «Եվրոպացիներն այդպես են վարվում, քանի որ հուսահատաբար ցանկանում են պայմանավորվել Էրդողանի հետ սիրիացի փախստականներին պահելու հարցում:  Իսկ Վաշինգտոնը Թուրքիային դիտարկում է որպես «Իսլամական պետության» դեմ պայքարում անփոխարինելի դաշնակցի», - մեկնաբանել է քուրդ գործիչը: