Անդամահատված զինծառայողները լիարժեք բուժում ստանալուց հետո կպրոթեզավորվեն պետության հաշվին. ռազմական բժիշկ

Tert.am-ը գրում է.

Քառօրյա պատերազմի հետևանքով վիրավոր զինծառայողները, որոնք անդամահատվել են, լիարժեք բուժում ստանալուց հետո կպրոթեզավորվեն պետության հաշվին. «Ազատություն» ռադիոկայանի ուղիղ եթերում ասաց հոսպիտալի ռազմական բժիշկ Արմեն Հովսեփյանը: 

«Պրոթեզավորման խնդիր ունեցող զինծառայողների հարցով աշխատանքներ տարվում են, դա նեղ մասնագիտական է և այս պահին դեռևս բուժման շրջանում են: Դա շատ անհատական խնդիր է, ում ինչ տեսակի պրոթեզ է պետք կամ բուժում է պետք, և  պետությունն իր վրա կվերցնի այդ ծախսերը»,- ասաց նա:

Արմեն Հովսեփյանը նշեց, թե բուժում ստացող զինծառայողների մեծամասնությունը կարող է վերադառնալ և շարունակել ծառայությունը: «Կոնկրետ թիվ դեռ չենք կարող ասել, դեռ պետք է հաշվառել, վերջնական բուժումից հետո կհասկանանք, բայց վիրակապով զինվոր չի գնալու: Չնայած որ իրենք մղում ունեն, ձգտում ունեն, բայց դա չի նշանակում, որ պետք է գնան»,- ասաց նա:

Ռազմական բժիշկը օրինակով խոսեց, թե երբ մի զինվորի մոտ սխալմամբ ասել են, որ եթե հանկարծ զորացրվեք, այդ զինվորը հակադարձել է. «Ասեց՝ ոնց զորացրվենք, ես պետք է գնամ հլա, ի՞նչ եք ասում»: 

Հոգեբան Անուշ Ալեքսանյանը խոսեց զինվորների հոգեբանական վիճակի մասին և նշեց, թե նկատում է, որ ավելի սահուն են անցնում հոգեբանական խնդիրները, քան ասենք դա կարող էր լինել վթարի հետևանքով եղած դեպքում:

«Մեր զինվորները պատրաստ են եղել իրականում, հոգեբանական իմաստով տեսնում ենք, որ պատրաստ էին այս ամենին, և կարողացել են լուրջ դիմադրություն ցույց տալ»,-ասաց նա: