Մարդասիրական օգնություն զոհված զինծառայող Քյարամ Սլոյանի ընտանիքին (լուսանկարներ)

Shabat.am-ը գրում է.

Մեկ շաբաթ առաջ ֆեյսբուքյան օգտատեր Դավիթ Զախարյանը փորձել էր սոցցանցի միջոցով օգնել քառօրյա պատերազմի ընթացքում զոհված Քյարամ Սլոյանի ընտանիքի անդամներին, ովքեր ունեն ֆինանսական խնդիր, և ապրում են սոցիալապես ծանր պայմաններում: Բացվել էր հաշվեհամար, որին մարդիկ հնարավորություն ունեին դրամական աջակցություն ցուցաբերել: Ապրիլի 16-ին ավարտվեց միջոցառումն ու Հյուսիսային պողոտայում մեկ օր կազմակերպվեց դրամահավաք, որտեղ մարդիկ իրենց լուման էին ներդրում, բերելով ոչ միայն հագուստ, սնունդ, այլ կենցաղային տեխնիկա՝ լվացքի մեքենա, փոշեկուլ, խոհանոցային ապրանքներ և այլ անհրաժեշտ իրեր:

«Երեք ժամ տևած դրամահավաքի արդյունքում հավաքվեց 1,030,000 դրամ, 145 ԱՄՆ դոլար, 500,000 դրամ փոխանցում էր կատարել ԱԺ փոխնախագահ Հերմինե Նաղդալյանը և 1000 ԱՄՆ դոլար կանխիկ գումար է տվել ֆոտոլրագրող Գագիկ Շամշյանը: Գումարն ամբողջությամբ փոխանցվել է Սլոյանների ընտանիքին»,- այս մասին Shabat.am-ի հետ զրույցում ասաց ակտիվիստ Վաղինակ Շուշանյանը:

«Մարդիկ ինչքանով, որ կարողացան օգնեցին այդ ընտանիքին: Օգնության նպատակն էր թեթևացնել այս ընտանիքի հոգսը, սա պետք է իշխանության համար լինի օրինակ, որպեսզի աջակցնեն ոչ միայն զոհված, այլև վիրավորված ու հաշմանդամ մնացած զինծառայողներին: Կարիքավոր մարդանց խնդիրները պետք է լուծեն, ոչ թե միջին աշխատավարձով ապրող մարդիկ, այլ իշխանությունները »,-Shabat.am-ի հետ զրույցում ասաց միջոցառման կազմակերպիչ Դավիթ Զախարյանը: 

Նա նշեց, որ նման միջոցառումները շարունակական են լինելու և արդեն բացվել է նոր միջոցառում, որի միջոցով հնարավոր կլինի օգնել զոհված զինծառայողների ընտանիքներին: