Ֆրանսահայ ճանաչված օպերային երգչուհի Մարիամ Սարգսյանը ելույթ կունենա հայրենիքում

Ս.թ. ապրիլի 19-ին, ժամը՝ 19:00-ին, Կոմիտասի թանգարան-ինստիտուտում տեղի կունենա ճանաչված օպերային երգչուհի Մարիամ Սարգսյանի (մեցցո սոպրանո, Ֆրանսիա) համերգը՝ դաշնակահար Արթուր Ավանեսովի մասնակցությամբ:

Ինչպես հայտնում է Past.am-ը,երեկոյի ընթացքում տեղի կունենա «Հայ կոմպոզիտորների ստեղծագործություններ ձայնի և դաշնամուրի համար» ձայնասկավառակի շնորհանդեսը, որում ներառված են Ռոմանոս Մելիքյանի, Տիգրան Մանսուրյանի և Արթուր Ավանեսովի ստեղծագործությունները: Ս.թ. ապրիլի 20-ին, ժամը՝ 20:00-ին, Գաֆէսճեան արվեստի կենտրոնում տեղի կունենա կամերային երաժշտության համերգ՝ ֆրանսահայ օպերային երգչուհի Մարիամ Սարգսյանի, կանադացի կլարնետահար Յուլիանա Միլքիսի և դաշնակահար Արթուր Ավանեսովի մասնակցությամբ: Կհնչեն Կոմիտասի, Տրգրան Մանսուրյանի, Ալեքսանդր Հարությունյանի ու Ռոմանոս Մելիքյանի ստեղծագործությունները, ինչպես նաև Գիա Կանչելիի «Մանրանվագներ կլարնետի ու դաշնամուրի համար՝ կինոյի ու թատրոնի երաժշտություն»:

Մարիամ Սարգսյանը մեծանուն օպերային երգչուհի Զարուհի Դոլուխանյանի աշակերտուհին ու գործի շարունակողն է: Մ. Սարգսյանն ավարտել է նաև հանրահայտ «Schola Cantorum»-ը և Փարիզի «EcoleNormale de Musique» կոնսերվատորիան: Երգչուհու ստեղծագործական կյանքում առանձնահատուկ ուշադրություն է հատկացվում նոր վոկալ երգացանկի ձևավորմանը: 2014 թվականին բրիտանական հեղինակավոր «Gramophone Magazin»–ը Մ. Սարգսյանին անվանել է «ռոմանսի անզուգական վարպետ»:

Մարիամ Սարգսյանը պարբերաբար հանդես է գալիս Եվրոպայի, Ամերիկայի և Իսրայելի հեղինակավոր համերգասրահներում: Սկավառակի ֆրանսիական ակադեմիան (Académie du Disque Lyrique) մեցո սոպրանո Մարիամ Սարգսյանին «Ոսկե Օրփեոս» է շնորհել «Tristesse des choses» («Իրերի թախիծը») սկավառակի ձայնագրության համար։ Մրցանակը 2015 թ. հունիսին Փարիզի Շատլե թատրոնում կայացած մրցանակաբաշխության ժամանակ հանձնել էր Փարիզի օպերայի եւ Սկավառակի ակադեմիայի պատվավոր նախագահ եւ Իվ Սեն Լորանի ֆոնդի նախագահ Պիեռ Բերժեն։

Մարիամ Սարգսյանն իր համերգային գործունեության ընթացքում մեծապես կարևորում է նաև հայրենիքի հետ ստեղծագործական կապերի ձևավորումը և համերգներով ներկայանալը:

Լևոն Փանոսյան