Առաջնագծում «վագր» տղերք են կանգնած. հոսպիտալում բուժում ստացող զինծառայողները ապաքինվելու են, գնան կիսատ գործն ավարտեն (տեսանյութ, լուսանկարներ)

ՀՀ ՊՆ Կենտրոնական կլինիկական զինվորական հոսպիտալում այս պահի դրությամբ գտնվում է 49 վիրավոր, որոնցից 3-ը Երկրապահ կամավորական միության անդամներ են, մնացած 46՝ զինծառայողներ: Այս մասին այսօր՝ ապրիլի 18-ին, լրագրողներին հայտնեց հոսպիտալի պետ Արամ Ասատուրյանը:Հոսպիտալում այս պահին բուժում են ստանում ինչպես ապրիլյան քառօրյա պատերազմի ընթացքում, այնպես էլ դրան նախորդող օրերին վիրավորված զինծառայողներ:

Մարտի 25-ին հերթական դիվերսիայի հետևանքով հրազենային վիրավորում ստացած 18-ամյա շարքային զինծառայող Էդգար Մխիթարյանըի տրամադրությունը բարձր է. ոտքը կարողանում է շարժել, քայլել: Երևան է տեղափոխվել Ստեփանակերտի հոսպիտալից, դրանից առաջ եղել է Մարտակերտի հոսպիտալում: Ասում է, դեռ պիտի ապաքինվի, վերադառնա ծառայության՝ կիսատ թողած գործեր ունի, պիտի դեռ մի քանի ադրբեջանցի հասցնի ոչնչացնել:

Մատաղիում վիրավորված սերժանտ Էդիկ Մարտիրոսյանը երկու օրից կդառնա 20 տարեկան: Ուզում է շուտ ապաքինվել, գնալ հասնել ընկերներին:
«Վիրվորվել եմ ապրիլի 4-ին, ականի հրետանային պայթյունից: Ապրիլի 1-ին մարտական հերթապահության ընթացքում, գիշերը 4-ին 10 պակաս հակառակորդը սկսել է տարբեր տիպի կրակոցներ արձակել, 4 օր անխնա կռվել եմ՝ առանց մտածելու, որ կարող է վիրավորվեմ, քանի որ կատարում եմ սուրբ գործ»: Էդիկ Մարտիրոսյանը ստացել երկու ոտքի և երկու ձեռքի մատների, ինչպես նաև դեմքի շրջանում վնասվածքներ:

22-ամյա Թաթուլը բանակում չի ծառայել, բայց այս օրերին կամավոր մեկնել է Արցախ: Վիրավորվել է ապրիլի 6-ին Թալիշում: 
«Թոքերս են կտրվել, ոտքս ասկոլկա է մտել, թևիս տակ ասկոլկա կա, շատ չեմ կարող խոսել, բայց դե լավ է՝ փառք Աստծո»,-ասաց Թաթուլը:

Տեսանյութը՝ այստեղ