Չեխիայի հայ համայնքը Եվրամիությունից կպահանջի արժանի գնահատական տալ 1915 թվականի դեպքերին

Չեխիայի հայ համայնքը կդիմի Եվրամիությանը վերանայելու իր մոտեցումը և 1915 թվականին Օսմանյան Թուրքիայի կողմից հայերի նկատմամբ իրականացրած ցեղասպանությանը տալու արժանի գնահատական: Այս մասին «Արմենպրես»-ի հետ զրույցում նշեց «Ուրարտու» հայ չեխական միության նախագահ Ալեքսանդր Սարգսյանը:

Չեխիայում գործում է «Ապրիլ 24 կոմիտե», որն արդեն շուրջ 5 տարի է` համակարգում է ապրիլի 24-ի ծրագրերը: Այս տարի որոշվել է, որ ապրիլքսանչորսյան միջոցառումները սկսվելու են ապրիլի 22-ին, կշարունակվեն 23-ին և կեզրափակվեն  24-ին: Մեկնարկը կտրվի ապրիլի 22-ին Յիհլավա քաղաքում: Այնտեղ տեղադրված է խաչքար, որտեղ հայ համայնքի ներկայացուցիչները ծաղիկներ կխոնարհեն, ծաղկեպսակ կդնեն` հարգելով Հայոց ցեղասպանության անմեղ զոհերի զոհերի հիշատակը: Այնուհետև տեղի Սուրբ Հոգու եղեկեցում կմատուցվի պատարագ, մոմավառություն: Միջոցառումներ կլինեն ապրիլի 23-ին Բռնո քաղաքում:  

Ապրիլի 24-ին Պրահայում տեղի հայկական եկեղեցում կմատուցվի պատարագ, ծաղկեպսակ կդրվի Ֆրանց Վերֆելի հուշաքարի մոտ, իսկ հետո հայ համայնքի ներկայացուցիչները երթով կգնան դեպի Պրահայում տեղադրված խաչքար:

«Մեր գլխավոր ուղերձն այն է, որ Հայոց ցեղասպանությունից 101 տարի անց ոչինչ չի մոռացվել: Հայ ազգը պահանջատեր է, 101 տարին ոչ թե վերջն է, այլ նոր գործի սկզբն է»,-ասաց Ալեքսանդր Սարգսյանը: Նրա տեղեկացմամբ նամակ կփոխանցեն Չեխիայում Թուրքիայի դեսպանատանը, ինչպես նաև կդիմեն Եվրամիության գրասենյակին վերանայելու իր մոտեցումը և ճիշտ գնահատական տալու անցյալում կատարվածին: Ալեքսանդր Սարգսյանը ընդգծեց, որ հանցագործը պետք է պատժվի: