Խաղաղության կոչով, հայկական պարով՝ հայերն ու գերմանացիները բարձրաձայնել են Արցախում կատարվածի մասին

Գերմանիայի Ռեգենսբուրգ քաղաքի կենտրոնական հրապարակներից մեկում 1.5 ժամ թևածել է հայկական երգն ու պարը՝ մշակույթի լեզվով Արցախում տեղի ունեցող իրադարձությունների վերաբերյալ գերմանական հասարակության իրազեկվածությունը բարձրացնելու նպատակով: Ակցիայի կազմակերպիչը Գերմանիայում բարձրագույն կրթությունը շարունակող Աննա Բաբայանն է, ում հաջողվել է մեկ շաբաթում միավորել հայ և գերմանացի իր ծանոթներին, շատ արագ ստանալ միջոցառում անցկացնելու թույլտվություն: «Արմենպրես»-ի հետ զրույցում Ռեգենսբուրգի համալսարանի համեմատական մշակութաբանության մագիստրատուրայի ուսանող, Մանհեյմ քաղաքի Գյոթեի ինստիտուտի մշակութային հարցերի պատասխանատու Աննա Բաբայանը մանրամասներ ներկայացրեց նախապատրաստական աշխատանքների ու միջոցառման բուն ընթացքի վերաբերյալ: Նրա խոսքով՝ աշխատանքի բերումով պետք է մեկներ այլ քաղաք, սակայն, իմանալով սահմանում իրադրության սրման մասին, որոշել է հետաձգել գործերը ու իր ընկերների հետ փոքրիկ ներդրում ունենալ խաղաղության հաստատման գործում: «Ես պարի դասեր եմ տալիս գերմանական մի խմբի, որի անդամները ցանկանում էին Թամզարա, Քոչարի, Էջմիածին պարերը սովորել: Գլխումս մի միտք ծագեց, որ կարելի է ֆլեշմոբ կազմակերպել, որով էլ Լեռնային Ղարաբաղում տեղի ունեցող իրադրության վերաբերյալ մեր բողոքը կարտահայտեինք: Ինձ համար կարևոր էր, որ այդ գործում ոչ միայն հայկական կողմը մասնակցեր, այլև գերման ական հասարակությունը իր մասնիկն ունենար: Դրա համար էլ որոշեցի մոդեռն ոճով հանդես գալ. ոչ թե դասական բողոքի երթ նախաձեռնել, այլ պարի, մշակույթի միջոցով բարձրաձայնել խաղաղությունը վերականգնելու մեր կոչը: Ի վերջո Արցախում ամբողջ մշակույթ, մի ողջ հասարակություն են ուզում ոչնչացնել, բայց չեն կարող, քանի որ մեր մշակույթը շատ հզոր է: Եթե իրենք զենքերով են կռվում, մենք էլ մեր մշակույթով ու պարով կկռվենք ու կհաստատենք խաղաղության մեր ուղին»,-ասաց հայ ուսանողուհին:

Ֆլեշմոբին մասնակցելու Աննա Բաբայանի առաջարկը գերմանական խումբը չի մերժել, նրանց են միացել նաև Մյունխենի«Անուշ» պարախմբի ներկայացուցիչները՝  ղեկավար Անուշ Չախալյանի գլխավորությամբ: Նյուրնբերգից հայազգի դհոլահար ու զուռնա նվագողներ են միացել. բոլորը համաձայնել են գալ ու հայրենիքի առաջ իրենց պարտքը կատարել: «Միջոցառումը կազմակերպվել է մեկ շաբաթվա ընթացքում, թույլտվությունը շատ արագ ստացա՝ երկար տարիների ծանոթություն ունենալով քաղաքապետարանի աշխատակիցների հետ: Ամենալավ տեղը տրամադրեց ին՝ Ազգային թատրոնի դիմաց, Երաժշտության տան դիմացի շատարվանի շուրջ, շուրջպարի համար շատ հարմար վայր է: Մեր ապահովության համար (քանի որ Ռեգենսբուրգում ադրբեջանցիներ ու թուրքեր են ապրում) նրանք նաև ոստիկաններ տրամադրեցին: Համալսարանական կաթոլիկ միությունը աջակցեց տեխնիկայի հարցում, անվճար տրամադրվեց էլեկտրաէներգիան: Մեզ աջակցեց նաև Ռեգենսբուրգում բնակվող Հարություն Սարիկ անունով բարերարը, ով միշտ հայկական միջոցառումները ֆինասնավորում է: Ֆլորա  Բաբայանը, ով ի դեպ իմ բարեկամուհին չէ, խոհանոցի հետ կապված մասն ապահով եց՝ ֆլեշմոբի մասնակիցներին հայկական կերակուր մատուցելով»,-տեղեկացրեց Աննա Բաբայանը:

Ֆլեշմոբի մասնակիցները կրել են սպիտակ վերնաշապիկներ՝ խորհրդանշելով խաղաղությունը: Այդ կոչն են փոխանցել նաև պաստառները, որոնցից մեկը Մահաթմա Գանդիի «Չկա ճանապարհ խաղաղության համար, խաղաղությունը հենց ճանապարհն է» ցիտատով է եղել: «Գերմանական հասարակությունն այնքան էլ լավ տեղեկացված չէր Լեռնային Ղարաբաղի խնդրի շուրջ, քանի որ գերմանական մեդիաները շատ խեղաթյուրված ինֆորամացիա էին տրամադրում, ինչը մեր զայրույթն էր առաջացրել»,-հայտնեց Աննա Բաբայանը:

Նրա խոսքով՝ միջոցառումը պետք է տևեր կես ժամ, սակայն տևել է 1.5 ժամ, որի ընթացքում 3 պարի փոխարեն առնվազն 7-8 պար է ներկայացվել. քոչարիներ, միասնության շուրջպար, Արա Գևորգյանի Արցախը: «Ինտերակտիվ միջոցառում էր, գերմանացիները նայում էին, գալիս իրենք էլ փորձում էին պարել, ոմանք էլ լուսանկարում ու տեսնակարահանում էին: Մենք էլ թռուցիկներ էինք բաժանում: Հետաքրիքր փաստ նշեմ, որ գերմանացիները հերթով գալիս ու շնորհակալություն էին հայտնում, ասում էին, որ Գերմանիան պակաս ունի նման համերաշխ ակցիաների ու շատ բան սովորեցին՝ ծանոթանալով հայկական մշակույթին: Նրանց համար բաահայտում էր, որ նման համախմբված ազգ գոյություն ունի»,-գերմանացիների խոսքը փոխանցեց մեր զրուցակիցը:

Միջոցառման ընթացքում նաև դրամահավաք է կազմակերպվել ու 1,5 ժամվա ընթացքում հավաքվել մի քանի հարյուր եվրո, ինչը կազմակերպիչների կարծիքով՝ բավականին լավ ցուցանիշ է՝ իմանալով գերմանացիների բնավորությունը: Հավաքված գումարը միանալու է համայնքի մեկ այլ ներկայացուցչի՝ Արա Ղազարյանի նախաձեռնած «Օգնություն Լեռնային Ղարաբաղին» ֆոնդին, որը հակամարտությունից տուծածների համար բժշկական միջոցներ պետք է գնի և ուղարկի Հայաստան: «Նախաձեռնության առաջին նվիրատվությունը այս ակցիայի միջոցով եղավ, երկրորդը տեղի կունենա ապրիլի 23-ին: Շարուն ակական բնույթ է այն կրելու, բոլորս մեծ ուժ ու եռանդ ենք ներդնում հաջողության հասնելու համար:Տեր-Այգիկ քահանա Հովհաննիսյանի հետ միասին,  ով մեր հոգևոր առաջնորդն է, միացել ենք բոլորս ու ֆինանսական հանգանակության համար տարբեր ակցիաներ ենք կազմակերպում»,-եզրափակեց Աննա Բաբայանը:

Ուսանողուհին նկատեց նաև, որ հայկական սփյուռքի ներուժն օգտագործելու նոր մեխանիզմներ են հարկավոր, որոնք պետք է հաշվի առնեն սփյուռքի երիտասարդների հետաքրքրությունները: