Էկվադորում երկրաշարժի զոհերի թիվը հասել է 413-ի

Էկվադորում տեղի ունեցած ավերիչ երկրաշարժի հետեւանքով 413 մարդ է զոհվել: Այդ մասին, ինչպես տեղեկացնում է «Արմենպրես»-ը, ապրիլի 18-ին հայտնել են հարավամերիկյան երկրի անվտանգության նախարարությունում:

«Պաշտոնական աղբյուրների տվյալներով՝ ներկայում խոսքը վերաբերում է 413 զոհվածների»,- նշվում է գերատեսչության հայտարարության մեջ: Ավելի վաղ հաղորդվել էր, որ երկրաշարժը 366 մարդու կյանք է խլել: Բացի այդ, նախարարության տեղեկատվության համաձայն, ավելի քան 230 մարդ անհայտ կորած է համարվում:

Ներկայում շարունակվում է փլատակների հավաքումը: Առավել տուժած շրջաններում աշխատում են հազարից ավելի փրկարարներ ու հրշեջներ:

ՄԱԿ-ի գլխավոր քարտուղարի հումանիտար հարցերով տեղակալ Սթիվեն Օ՛Բրայենը կայցելի Էկվադոր՝ «անձամբ ծանոթանալու ավերիչ երկրաշարժի հետեւանքներին»: Այդ մասին հայտնել է նրա գլխավորած Հումանիտար հարցերի համակարգման վարչությունը:

Գլխավոր քարտուղարի տեղակալը նպատակ ունի «աջակցություն ցուցաբերել ազգային ջանքերին եւ մոբիլիզացնել դոնորների օգնությունը» երկրի վերականգնման աշխատանքները ֆինանսավորելու համար:

Էկվադորում ավերիչ երկրաշարժը տեղի է ունեցել ապրիլի 16-ի երեկոյան: Դրա էպիկենտրոնը գտնվում էր Պեդեռնալես քաղաքի շրջանում՝ Մանաբի հյուսիսարեւմտյան նահանգում: Տարածաշրջանի մի քանի երկրներ, այդ թվում՝ Բոլիվիան, Կոլումբիան եւ Վենեսուելան, փրկարարների եւ մարդասիրական օգնություն են ուղարկել Էկվադոր, հաղորդել է ՏԱՍՍ-ը: