Լեյլա եւ Արիֆ Յունուսները լքել են Ադրբեջանը

Ադրբեջանցի իրավապաշտպաններ Լեյլա եւ Արիֆ Յունուս ամուսիններին վերջապես հաջողվել է լքել Ադրբեջանը:

Այս մասին ադրբեջանական ԶԼՄ-ներին հայտնել է նրանց փաստաբան Էլչին Սադըգովը:

Նրա խոսքով` Լեյլա եւ Արիֆ Յունուսներին թույլատրվել է լքել Ադրբեջանը:

«Նրանց այցելել է Բեռլինի Charite կլինիկայի բժիշկ Քրիստիան Վիտտը եւ եզրակացություն տվել ամուսինների առողջական վիճակի ոչ բավարար լինելու մասին: Արդյունքում նրանց թույլատրվել է բուժման համար արտասահման մեկնել», -ասել է Սադըգովը:

Նրա խոսքով` Լեյլա եւ Արիֆ Յունուս ամուսինները Ադրբեջանը լքել են այսօր առավոտյան եւ մեկնել Նիդեռլանդներ:

«Ներկայում նրանք իրենց դստեր` Դինարայի հետ են: Նրանք այստեղ կհանգստանան մարդու իրավունքների համար երկար եւ դժվար պայքարից հետո», -հայտարարել է Հոլանդիայի արտաքին գործերի նախարար Բերտ Կունդերսը:

60-ամյա Լեյլա եւ Արիֆ Յունուսները տառապում են լուրջ հիվանդություններով, որոնք սրվել են նրանց բանտարկման ժամանակաշրջանում: Երկար ամիսներ Ադրբեջանի իշխանությունները հրաժարվում էին բուժման համար դուրս թողնել նրանց արտասահման՝ պայմանավորելով դա նրանց նկատմամբ քրեական գործ լինելու հետ: 

Լեյլա եւ Արիֆ Յունուսները 2015 թվականի օգոստոսի 13-ին ծանր հանցագործությունների դատարանի կողմից դատապարտվել են համապատասխանաբար 8,5եւ 7 տարի ժամկետով ազատազրկման` դատարանի կողմից կոպտորեն խախտելով միջազգային չափանիշները եւ պատշաճ դատական գործընթացը: 2015թվականի դեկտեմբերի 9-ին նրանց պայմանական ազատ են արձակել 5 տարի փորձնական ժամկետով:

Երկու իրավապաշտպաններն էլ ձերբակալվել էին իշխանություններին քննադատելու եւ հասարակական գործունեության համար:

Ադրբեջանում Լեյլա Յունուսը եւ նրա ամուսին Արիֆ Յունուսը մեղադրվում են նաեւ, իբր, Հայաստանի օգտին լրտեսություն կատարելու մեջ, սակայն, նրանց հետապնդելու իրական պատճառը Ադրբեջանում առկա 100-ից ավելի քաղաքական բանտարկյալների խնդրի ակտուալացումն ու Բաքվում 2015 թվականի մայիսին անցկացված Եվրոպական խաղերը բոյկոտելու մասին կոչերն են: Amnesty International կազմակերպությունը Լեյլա եւ Արիֆ Յունուսներին «խղճի բանտարկյալներ» է ճանաչել: