Ֆարմանյանը ԵԽԽՎ-ում բարձրաձայնել է Ադրբեջանի իրականացրած ռազմական հանցագործությունների մասին

Բրյուսելում վերջին ահաբեկչական հարձակումները և վերջերս Լեռնային Ղարաբաղի հակամարտության գոտում իրավիճակի կտրուկ սրումը սթափվելու կոչ են բոլորին առ այն, որ մարդկանց կյանքը վտանգի տակ է, որ բարբարոսական իրադարձությունները մարդկանց մոտ թարմացնում են անցյալի հիշողությունները: Այս մասին ԵԽԽՎ լիագումար նիստի ընթացքում իր ելույթում ասել է Ե ԽԽՎ հայաստանյան պատվիրակության անդամ Սամվել Ֆարմանյանը: «Մենք պետք է ապացուցենք, որ քաղաքական ինստիտուտները, խորհրդարանները դեռևս ունակ են դիմակայել այն մարտահրավերներին, որոնց մենք այսօր առերեսվում ենք: Մենք պետք է ապացուցենք, որ փոխզիջում չի կարող լինել, երբ խոսքը գնում է առավել հիմնարար արժեքի՝ մարդու ապրելու իրավունքի մասին»,- ասել է Ֆարմանյանը:

Պատգամավորն իր գործընկերներին հիշեցրել է, որ վերջերս  Ադրբեջանը Լեռնային Ղարաբաղի ժողովրդի դեմ սանձազերծել է լայնամասշտաբ ագրեսիա շփման գծի ողջ երկայնքով, ինչի հետևանքով շրջանառության մեջ է մտել նոր տերմին՝ «չորսօրյա պատերազմ»: Նա ընդգծել է, որ ադրբեջանական բանակը կիրառել է մահացու հարձակվողական զենքեր՝  կոպտորեն խախտելով միջազգային բոլոր նորմերը: «Ադրբեջանի կողմից ուժի կիրառումը հակասում է միջազգային իրավական հիմնական փաստաթղթերին՝ ՄԱԿ-ի կանոնադրությանը, Հելսինկյան եզրափակիչ ակտին և այլն: Ադրբեջանական բանակը նպատակաուղղված թիրախավորել է քաղաքացիական բնակչությանը: 12-ամյա Վաղինակ Գրիգորյանը զոհվեց, ևս երկու երեխա վիրավորվեց ադրբեջանական զինուժի կողմից դպրոցը գնդակոծելու հետևանքով: Եվ սա քաղաքացիական բնակչության նկատմամբ բռնության միակ դեպքը չէր: Վալերա և Ռազմելա  Խալափյանները՝ տարեց զույգը, սպանվել են իրենց տանը: Ադրբեջանցի զինվորականները կտրել են նրանց ականջները: Նրանք նաև սպանել են 92-ամյա Մարուսյա Խալափյանին, ինչպես նաև խոշտանգել են 104-ամյա Հայկա տատիկին, ով, ի դեպ, 6 տարով ավելի մեծ է, քան Ադրբեջանը, որպես երկիր: Սպանված և խոշտանգված անձին ք եղել են տարեց մարդիկ»,- ասել է պատգամավորը:

Ֆարմանյանը հավելել է, որ ԼՂ պաշտպանության բանակի զինծառայողներ Քյարամ Սլոյանը, Հայկ Թորոյանը և Հրանտ Ղարիբյանը գլխատվել են ադրբեջանական զորքերի կողմից: «Այո, նրանց գլխատել են «Իսլամական պետություն» ահաբեկչական խմբավորման ոճով: Սոցիալական ցանցերում առկա լուսանկարներն իրական վկայություն են ադրբեջանական զինվորների դաժան վերաբերմունքի: Ավելի ուշ, Քյարամ Սլոյանի կտրած գլուխը զինվորականները ցուցադրել են ադրբեջանի քաղաքացիական բնակչությանը՝ խրախուսելով ագրեսիան և ատելությունը հայերի հանդեպ: Պաշտոնական Բաքվի կողմից ոչ մի գործողություն չձեռնարկվեց մեղավորներին պատժելու համար: Սրանով Ադրբեջանը ևս մեկ անգամ խախտել է բազմաթիվ միջազգային օրենքներ, այդ թվում՝ Ցեղասպանությունների կանխարգելման և պատժի մասին կոնվենցիան, Ռասսայական խտրականության բոլոր ձևերի վերացման միջազգային կոնվենցիան, Մարդու իրավունքների եվրոպական կոնվենցիան, պատերազմի զոհերի պաշտպանության Ժնևյան կոնվենցիան և այլն»,- ասել է Ֆարմանյանը՝ հավելելով, որ խաշտանգված են եղել նաև հայկական կողմին վերադարձված 18 հայ զինծառայողների մարմինները:

Պատգամավորը շեշտել է, որ ադրբեջանական զինված ուժերը և գրոհայինները իրականացրել են ահաբեկչական գործողություններ ղարաբաղյան բանակի զինվորների և քաղաքացիական բնակչության նկատմամբ, որոնք միջազգային իրավունքներով  որակվում են որպես ռազմական հանցագործություն և մարդկության դեմ ուղղված հանցագործություն: «Թե Ադրբեջանի իշխանությունները, թե ռազմական հանցագործություն կատարած անձինք պետք է պատասխանատվության ենթարկվեն միջազգային օրենքների խախտումների և ռազմական հանցագործությունների համար»,- ասել է Սամվել Ֆարմանյանը:

Նա վեհաժողովին կոչ է արել հստակ դատապարտել ադրբեջանական զինուժի կողմից կատարված բռնությունները և կոչ անել Ադրբեջանի կառավարությանն ապահովել պատշաճ հետաքննություն Լեռնային Ղարաբաղի ժողովրդի դեմ իրականացված հանցագործությունների համար: Ֆարմանյանը միջազգային հանրությանը նաև կոչ է արել նամապատասխան միջոցներ ձեռնարկել՝ մարդու միջազգային իրավունքների կոպիտ խախտումները և ընդհանրապես միջազգային օրենքների խախտումները բացառելու համար: