Հուշարձանների և տեսարժան վայրերի միջազգային օրը՝ «Էրեբունի» պատմահնագիտական արգելոց-թանգարանում

Հուշարձանների և տեսարժան վայրերի միջազգային օրվա շրջանակում «Էրեբունի» պատմահնագիտական արգելոց-թանգարանում բացվել է «Առյուծի և ցուլի որսը Մերձավոր Արևելքում» խորագրով ցուցահանդես՝ նվիրված սպորտային ժառանգությանը: Ցուցահանդեսի բացմանը ներկա են գտնվել նաև Երևանի քաղաքապետարանի մշակույթի և տուրիզմի վարչության պետ Ռուբեն Հովհաննիսյանը և Երևանի քաղաքապետի օգնական Մարիա Բարաղամյանը: Բացման խոսքում ԻԿՕՄՕՍ-Հայաստանի նախագահ, «Էրեբունի» պատմահնագիտական արգելոց-թանգարանի տնօրեն Գագիկ Գյուրջյանն անդրադարձել է ցուցահանդեսում ներկայացված սպորտի զարգացման պատմությանը` հնագույն ժամանակներից: Ողջույնի խոսքով հանդես են եկել ՅՈՒՆԵՍԿՕ-ի գործերով Հայաստանի ազգային հանձնաժողովի գլխավոր քարտուղար Վահրամ Կաժոյանը, Երևանի քաղաքապետարանի մշակույթի և տուրիզմի վարչության պետ Ռուբեն Հովհաննիսյանը և ուրիշներ: Երևանի քաղաքապետարանի մշակույթի և տուրիզմի վարչության պետ Ռուբեն Հովհաննիսյանը, անդրադառնալով բացվող նոր ցուցահանդեսին, ընդգծել է, որ հայերը, ինչպես մի շարք ոլորտներում, այնպես էլ սպորտի բնագավառում մեծ ժառանգություն ունեն:

 Միջոցառմանը հատկանշվել է, որ կարևոր է պահպանել և փոխանցել մեր մշակութային հարուստ արժեքները ապագա սերունդներին, և այդ առումով «Էրեբունի» թանգարանը կարևոր աշխատանք է իրականացնում: Հուշարձանների և տեսարժան վայրերի միջազգային խորհրդի (ԻԿՕՄՕՍ) -ի առաջարկությամբ այս տարի Հուշարձանների միջազգաին օրը՝ ապրիլի 18-ը, այսպիսով նշվել է «Սպորտի ժառանգությունը» խորագրի ներքո: Հուշարձանների և տեսարժան վայրերի միջազգային օրվա շրջանակում ԻԿՕՄՕՍ-Հայաստանի և «Էրեբունի» արգելոց-թանգարանի համատեղ ջանքերով կազմակերպված «Առյուծի և ցուլի որսը Մերձավոր Արևելքում» ցուցահանդեսը կգործի մինչև 2016թ. մայիսի 8-ը:

Երևանի քաղաքապետարանի տեղեկատվության և հասարակայնության հետ կապերի վարչություն