«Արմատներ». հայոց ցեղասպանությանը նվիրված ֆիլմ՝ վերածննդի մասին

 Blognews.am-ը գրում է.

«Արմատներ», այսպես է կոչվում ռեժիսոր Վահե Յանի նոր ֆիլմը, որը փաստավավերագրական և խաղարկային ժանրերի խառնուրդ է։ Երեկ կայացավ ֆիլմի պրեմիերան, որին ներկա էին կինոյի անվանի գործիչներ, այսօրվանից այն մեծ էկրաններին է։

Անդրանիկ Բաբայանի, Մերի Մկրտչյանի, Արփինե Իսրայելյանի, Վարդան Հովսեփյանի, Գրիգոր Բաղդասարյանի, Իշխան Ղարիբյանի, Տաթև Հովակիմյանի, Թեհմինե Խաչատրյանի, Ռոզի Ավետիսովայի, Արման Նավասարդյանի և այլոց մասնակցությամբ ֆիլմի սցենարի հեղինակը Կարինե Խոդիկյանն է, բեմադրող ռեժիսորը՝ Վահե Յանը,  բեմադրող օպերատորը՝ Ռոբերտ Խարազյանը, կոմպոզիտորը՝ Անդրանիկ Բերբերյանը, գլխավոր պրոդյուսերը՝ Կարեն Ղազարյանը։

Վահեն նշեց, որ սա գեղարվեստական ֆիլմ նկարահանելու իր առաջին փորձն է և շնորհակալություն հայտնեց «Շարմ Հոլդինգին»՝ վստահության համար։

Հայոց ցեղասպանության տարելիցին նվիրված այս ֆիլմն արդեն էկրաններին է։ Այս անգամ, սակայն, հանդիսատեսը ոչ թե կտեսնի, թե ինչպես են կոտորել իր նախնիներին, այլ, թե ինչպես է վերածնվել հայը, ազգի համար կարևորագույն պահերին ինչպես է համախմբվում ու դառնում մեկ բռունցք։

Ֆիլմում ներկայացված են 100-ամյակի կապակցությամբ կազակերպված միջոցառումները, երևում է այն իրական միասնությունը, որ կար այդ օրերին։ «Արմատներում» շատ նուրբ թելով տարվում է արտագաղթի թեման, առաջին հայացքից, խոսքի մեջ ասված արտահայտություններն էլ ներառում են ֆիլմի գլխավոր մեսիջները։ Ֆիլմի հիմքում 3 տարեկանում Հայաստանից հեռացած և ԱՄՆ-ում մեծացած Արամի պատմությունն է, ով Հայոց ցեղասպանության 100-րդ տարելիցի շեմին որոշում է գալ Հայաստան և իր բլոգում լուսաբանել կատարվելիք իրադարձությունները: Թեև Արամը 6 տարի առաջ էլ եղել էր Հայաստանում, հենց այս օրերին Երևան գալով ու տեսնելով, թե ինչ ոգի կա ժամանակակից հայերի մեջ, ինչպես են համախմբվել մեկ գաղափարի շուրջ, որոշում է վերադառնալ հայրենիք։ Իհարկե, պատմությունն ուղեկցվում է նաև սիրո պատմությամբ, որը սփյուռքահայերին ավելի է կապում  հայրենի հողին, խորհրդանիշ դառնում, որ հայն իր երջանկությունը գտնում է հայրենի հողում։

                  

Նյութը՝ Ամալյա Հովհաննիսյանի

Լուսանկարները՝ Կարեն Հովհաննիսյանի