Լավագույն տղերքը հեռանում են. Ջերմուկ քաղաքում այսօր՝ տեղի է ունեցել պարտադիր ժամկետային զինծառայող, շարքային Կարեն Աղաբեկյանի հուղարկավորությունը (ՖՈՏՈՌԵՊՈՐՏԱԺ)

Ջերմուկ քաղաքում այսօր՝ ապրիլի 23-ին, զինվորական կարգով տեղի է ունեցել պարտադիր ժամկետային զինծառայող, շարքային Կարեն Աղաբեկյանի հուղարկավորությունը: 

 

Հուղարկավորությանը ներկա են եղել ԶՈւ բարձրաստիճան հրամանատարներ, Կարեն Աղաբեկյանի մարտական ընկերները, հարազատները, Ջերմուկի քաղաքապետ Վարդան Հովհաննիսյանը և այլոք:

 

/Երեկ ապրիլի 22-ին Ջերմուկի Սուրբ Գայանե եկեղեցում տեղի էր ունեցել զոհված պարտադիր ժամկետային զինծառայող, շարքային Կարեն Աղաբեկյանի հոգեհանգիստը /

Կարեն Աղաբեկյանը Ջերմուկ քաղաքի Կեչուտ գյուղի բնակիչ էր, մեկ տարի 2 ամսվա ծառայող: Կարենն ընտանիքի միջնեկ զավակն էր, ունի քույր և եղբայր:

 

Past.am-ը արդեն տեղեկացրել էր, որ առաջին կայազորային քննչական բաժնում քննություն է տարվում՝ զորամասի «ՈւԱԶ» մակնիշի ավտոմեքենայի վարորդ, պարտադիր ժամկետային զինծառայող, շարքային Կարեն Աղաբեկյանի մահվան հանգամանքները պարզելու ուղղությամբ։

 

Նախնական տվյալներով՝ 21.04.2016թ.՝ ժամը 14:30-ի սահմաններում, N զորամասի «ՈւԱԶ» մակնիշի ավտոմեքենայի ուղևոր, պարտադիր ժամկետային զինծառայող, շարքային Պ.Եգորյանը, խախտելով զենքի հետ վարվելու կանոնները, ինքնաձիգից կրակոց է արձակել, որի հետևանքով նշված ավտոմեքենայի վարորդ, պարտադիր ժամկետային զինծառայող, շարքային Կարեն Արտյուշի Աղաբեկյանը կրծքավանդակի աջ կեսի շրջանում ստացել է մահացու հրազենային վիրավորում։

 

Past.am-ի տեղեկությւոններով, առաջին կայազորային քննչական բաժնում հարուցվել է քրեական գործ՝ զենքի հետ վարվելու կանոնները խախտելու հետևանքով անզգուշությամբ մարդու մահ առաջացնելու դեպքի առթիվ: Պ.Եգորյանը ձերբակալվել է:

 

Քրեական գործով նախաքննությունը շարունակվում է, կատարվում են անհրաժեշտ քննչական եւ դատավարական այլ միջոցառումներ՝ դեպքի բոլոր հանգամանքների բազմակողմանի, օբյեկտիվ եւ լրիվ հետազոտումն ապահովելու ուղղությամբ:

 

 

Նարեկ Միրզոյան / Past.am

Կիսվել