Գավառ քաղաքում հիմնվեց ապրիլյան ազատամարտերում զոհված հայ հերոսներին նվիրված պուրակ

 Գավառի պետական համալսարանի բակում ապրիլի 24-ին հիմնվեց ապրիլյան քառօրյա պատերազմում զոհված հայ հերոսների հիշատակին նվիրված պուրակ։

«Արմենպրես»-ի տեղեկացմամբ՝ ավանդույթի համաձայն՝ յուրաքանչյուր գարնանանմուտին համալսարանի բակն հարստանում է նոր տնկիներով, սակայն ուսանողների հավաստմամբ այս պուրակն առանձնահատուկ նշանակություն եւ խորհուրդ ունի։

«Հայրենիքի պաշտպանության համար զոհված մեր հերոս եղբայրների հիշատակը հավերժացնող պուրակը՝ համալսարանականներիս ու գալիք սերունդների հոգում եւ հիշողության մեջ մշտապես վառ կպահի Արցախում հայրենիքի համար 2016 թվականի ապրիլյան սեւ քառօրյայի ընթացքում նահատակված հայորդիների հիշատակը»,-»Արմենպրես»-ի հետ զրույցում ասաց Գավառի պետհամալսարանի ուսանողական խորհրդի նախագահ Արեգ Սինանյանը։

Ուսանողական խորհրդի նախաձեռնությանը միացել էին նաեւ ԳՊՀ պրոֆեսորադասախոսական, վարչական անձնակազմի ներկայացուցիչներ։

«Ծառը նոր կյանքի խորհրդանիշ է, այնքան հաճելի զգացում է ծառ տնկելը, երբ գիտակցում ես, որ մի նոր տունկի կյանք ես տալիս, օգնում ես նրան կառչել հողից եւ շնչել, ապրել ու հարատեւել, ինչպես հայ ժողովուրդը: Սակայն, տխրում ենք, որ պուրակը նվիրված է Արցախում զոհված հերոսների հիշատակին: Թող բոլոր կնճռոտ խնդիրները լուծվեն խաղաղ ճանապարհով, եւ այլեւս ոչ մի զոհ չպահանջվի»,- նշեցին ԳՊՀ մի խումբ ուսանողներ:

Պուրակը հիմնվեց Հայաստանի երիտասարդական հիմնադրամի Գեղարքունիքի մարզային կենտրոնի եւ «Armenia Tree Project» կազմակերպության աջակցությամբ։