Բրյուսելի հայ համայնքը մոմավառությամբ, պատարագով և բողոքի երթով ոգեկոչել է Հայոց ցեղասպանության զոհերի հիշատակը

Բրյուսելի հայ համայնքը մոմավառությամբ, սուրբ պատարագով և բողոքի երթով հարգել է Հայոց ցեղասպանության զոհերի հիշատակը: Ինչպես «Արմենպրես»-ին հայտնեց Բրյուսելի հայ համայնքի ներկայացուցիչ Մարինե Ստեփանյանը, ապրիլի 23-ին Բրյուսելի Սուրբ Մարիամ Մագդաղենացի Հայ առաքելական եկեղեցու բակում լուռ մոմավառություն է տեղի ունեցել, իսկ ապրիլի 24-ին մատուցվել է սուրբ պատարագ, այնուհետ քայլերթ դեպի Թուրքիայի դեսպանություն:

Չնայած հորդառատ անձրևին ու կարկուտին՝ երթը շարունակվել է ու ծառայել իր նպատակին: «Հայ համայնքի շուրջ 500 անդամներ հավաքվել էր Բրյուսելի Սուրբ Միշել է Գյուդուլ տաճարի մոտ, որտեղից էլ մեկնարկեց քայլերթը դեպի թուրքական դեսպանատուն՝ երգելով, տարբեր կոչեր հնչեցնելով, դրոշներ պարզելով»,-ասաց Մարինե Ստեփանյանը:

Քայլերթի մասնակիցները հնչեցրել են «Մարդասպան Թուրքիա», «Լռությունը հավասար է ցեղասպանության ընդունմանը», «Հայաստան», «Պայքար, պայքար, մինչև հաղթանակ», «Պետք է դատապարտել թուրքական ֆաշիտական պետությանը» կոչերը: Մարինե Ստեփանյանի խոսքով՝ երթի մասնակիցները բարձրացրել են ոչ միայն հայերի, այլև ցեղասպանության զոհ դարձած այլ փոքրամասնությունների՝ հույների, ասորիների, եզդիների ձայնը՝ կոչ անելով ճանաչել ու դատապարտել բոլոր ազգերի նկատմամբ տեղի ունեցած ցեղասպանությունները: Թուրքիայի դեսպանատան աշխատակիցները երթին հետևել են պատուհաններից: