Վիրահայությունը հանրահավաք է անցկացրել ցեղասպանության տարելիցի կապակցությամբ

 Հայոց ցեղասպանության 101-րդ տարելիցի միջոցառումները Վիրահայոց թեմում մեկնարկեցին ապրիլի 23-ին հայկական եկեղեցիներում կատարված հանգստյան ժամերգությամբ: Ինչպես հաղորդում է«Արմենպրես»-ը, Թբիլիսիի Սուրբ Էջմիածին եկեղեցում, երեկոյան տեղի է ունեցել հանգստյան ժամերգություն, որին իրենց մասնակցությունն են բերել համայնքային տարբեր կառույցների երիտասարդներ: Հավարտ ժամերգության Վիրահայոց թեմի առաջնորդի օգնական Տեր Խորեն վարդապետ Հովհաննիսյանն իր պատգամն է փոխանցել ներկաներին, հորդորելով հավատարիմ և նախանձախնդիր լինել հայ Դատին և հայոց արդար պահանջատիրությանը: Ներկաները վառած մոմերով իրենց աղոթքն են բարձրացրել  առ Աստված:

Ապրիլի 24-ին մարդկանց հոսքը դեպի Թբիլիսիի Սուրբ Գևորգ առաջնորդանիստ և Սուրբ Էջմիածին եկեղեցիներ սկսվել է դեռևս վաղ առավոտյան՝ մասնակցելու եկեղեցում մատուցվող Երևան Սուրբ Խաչի տոնի և Հայոց Ցեղասպանության Սուրբ նահատակների հիշատակին մատուցվող Սուրբ և Անմահ Պատարագին:

Սուրբ Գևորգ առաջնորդանիստ եկեղեցում ներկա են եղել Վրաստանում Հայաստանի Հանրապետության արտակարգ և լիազոր դեսպան Յուրի Վարդանյանը, դեսպանության դիվանագետները, համայնքային գործիչներ, մտավորականներ, հավատացյալներ:
Պատարագիչ՝ Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանն անդրադարձել է Սուրբ խաչի երևմանը և կենարար խաչի մշտամնա զորությանն ու պահպանիչ ուժին:

Առաջնորդը հայցել է Հայոց ցեղասպանության Սուրբ նահատակների բարեխոսությունը հայ ժողովրդի, հայրենիքի ու նրա սահմանները պաշտպանող հայ զինվորի համար:
Հավլաբարի Սուրբ Էջմիածին եկեղեցում, կիրակնօրյա Սուրբ և Անմահ Պատարագից հետո, եկեղեցու բակում կանգնեցված Ցեղասպանության հիշատակի խաչքարի մոտ, հոգեշնորհ Տեր Խորեն վարդապետ Հովհաննիսյանի նախագահությամբ կատարվել է հատուկ արարողություն, ոգեկոչելու Հայոց ցեղասպանության սուրբ նահատակների հիշատակը:

Այնուհետև Սուրբ Էջմիածին եկեղեցու հարակից տարածքում թբիլիսահայությունը մասնակցել է Վրաստանի հայ համայնքի կազմակերպության՝ Հայոց Ցեղասպանության 101-րդ տարելիցին նվիրված հանրահավաքին: