Պատգամավորները պաշտպանության և արտաքին գործերի նախարարների հետ փակ հանդիպման անհրաժեշտություն են տեսնում

 Ազգային ժողովի պատգամավորները ցանկանում են փակ հանդիպում ունենալ Հայաստանի արտաքին գործերի և պաշտպանության նախարարների հետ՝ դրանից հետո Հայաստանի և Արցախի անվտանգության համակարգն ամրապնդելու համար արվող քայլերի վերաբերյալ հարցերին սպառիչ պատասխան ստանալու համար:

«Արմենպրես»-ի հաղորդմամբ՝ Ազգային ժողովի քառօրյա նիստի մեկնարկին արտաքին գործերի և պաշտպանության նախարարների հետ հանդիպում կազմակերպելու առաջարկներով հանդես եկան ՀԱԿ խմբակցության ղեկավար Լևոն Զուրաբյանը, ԲՀԿ խմբակցության ղեկավար Նաիրա Զոհրաբյանը, ՕԵԿ խմբակցության պատգամավորներ Հովհաննես Մարգարյանը և Մհեր Շահգելդյանը, անկախ պատգամավոր Խաչատուր Քոքոբելյանը, «Ժառանգություն» խմբակցության ղեկավար Զարուհի Փոստանջյանը:

ԱԺ փոխնախագահ Էդուարդ Շարմազանովը հիշեցրեց, որ քառօրյա պատերազմի օրերին խորհրդարանում անցկացվել է փակ հանդիպում, որին մասնակցել են պաշտպանության նախարարի առաջին տեղակալ Դավիթ Տոնոյանը և արտաքին գործերի նախարարի տեղակալ Շավարշ Քոչարյանը, ովքեր սպառիչ պատասխաններ են տվել պատգամավորների բոլոր հարցերին: Ի պատասխան՝ ԲՀԿ խմբակցության ղեկավար Նաիրա Զոհրաբյանը նկատեց՝ եթե պատգամավորները արտաքին գործերի և պաշտպանության նախարարների հետ հանդիպման անհրաժեշտություն են տեսնում, նշանակում է նրանք այդ հանդիպման ընթացքում չեն ստացել սպանիչ պատասխաններ: «Ելնելով այս հանգամանքից՝ մենք միանում ենք Ազգային ժողովում փակ հանդիպում կազմակերպելու առաջարկին: Մենք ունենք բազմաթիվ հարցեր, որոնք պարզաբանման կարիք ունեն: Այո, կան հարցեր, որոնք չպետք է հրապարակային լինեն, սակայն դրանց վերաբերյալ պարզաբանում ստանալը մեզ համար շատ կարևոր է»,- ասաց Զոհրաբյանը:

ԱԺ ՀՀԿ խմբակցության ղեկավար Վահրամ Բաղդասարյանը տեղեկացրեց, որ ապրիլյան քառօրյա պատերազմի առաջին իսկ օրերից ԱԺ բոլոր խմբակցությունների ղեկավարների մասնակցությամբ հանդիպման ընթացքում որոշում  է կայացվել ձևավորել հանձնախումբ, որում ներգրավված կլինեն բոլոր խմբակցությունների ղեկավարները և խորհրդարանական մշտական հանձնաժողովների նախագահները: «Այդ հանձնախումբը պետք է քննարկի ստեղծված իրավիճակը, վեր հանի առկա խնդիրները և բարձրաձայնի դրանց մասին: Եթե կլինի անհրաժեշտություն, մենք կդիմենք Ազգային ժողովի ղեկավարությանը՝ վարչÕ �պետի, արտաքին գործերի և պաշտպանության նախարարի հետ փակ հանդիպում կազմակերպել և նրանց ուղղել մեզ հուզող բոլոր հարցերը»,- ասաց Բաղդասարյանը: