Նախագահական 10 լավագույն նստավայրերը (լուսանկարներ)

Երկրների ղեկավարները բնակվում են հատուկ նստավայրերում, ոմանք էլ՝ պալատներում, որոնց մի մասի դռները բաց են սովորական մահկանացուների համար։ Ստորև ներկայացված են 10 լավագույն նախագահական նստավայրերը, որոնցում ցանկության դեպքում հնարավոր է էքսկուրսիա կատարել և բավականին ուշագրավ մանրամասների ծանոթանալ։

1. Սպիտակ տուն, ԱՄՆ

Երկու դարից ավելի այս նստավայրը ժողովրդավարության այցեքարտն է համարվում ամբողջ աշխարհում։ «Բաց դռների» ավանդույթը ձևավորվել է 3-րդ նախագահ Թոմաս Ջեֆերսոնի օրոք։ Այսօր Սպիտակ տան 132 սենյակներից բաց են միայն 9-ը, որոնց թվում են նախագահի աշխատասենյակը՝ Օվալաձև սենյակը, Երկնագույն սենյակը, գրադարանը և այլն։ Բացի այդ, այցելուներին թույլատրվում է զբոսնել Սպիտակ տան այգիներով և ուսումնասիրել Միշել Օբամայի բանջարեղենի մարգերը։ Սպիտակ տունը փակ է միայն կիրակի և երկուշաբթի օրերին։

2.Ելիսեյան պալատ, Ֆրանսիա

Այս շքեղ պալատի՝ ֆրանսիական կլասիցիզմի ու բարձրագույն իշխանության խորհրդանիշի պատմությունը սկսվել է նվերից։ Լյուդովիկոս 15-րդն այն գնել է իր սիրուհու՝ տիկին Պոմպադուրի համար։ Նրա բազմաթիվ կիսանդրիները մինչ այսօր զարդարում են պալատը, իսկ կառավարական կարիքների համար շինությունը սկսել են օգտագործել Նապոլեոն Բոնապարտի օրոք։ Պալատի ներքին դիզայնն արված է բարոկկո ոճի լավագույն ավանդույթներով։

3. Կվիրինալյան պալատ, Իտալիա

Այս շինությունը կառուցվել է Կվիրինալյան բլրի վրա 16-րդ դարում՝ որպես Հռոմի պապ Գրիգորիոս 13-րդի ամառային նստավայր։ Երկրի ղեկավարի աշխատասենյակը, ի տարբերություն իր օտարերկրյա գործընկերների աշխատասենյակների,  շատ ավելի համեստ է՝ 2 բյուրեղապակյա ջահ, ոսկյա շրջանակով հայելի, մարմարե բուխարի, մի քանի աթոռ և նրբաոճ գրասեղան։ Իտալիայի նախագահի նստավայրի մուտքը բաց է միայն կիրակի օրերին։

4. Հելսինկիի նախագահական պալատ, Ֆինլանդիա

Ֆինլանդիայի նախագահական պալատը գտնվում է Կաուպատորի հրապարակում։ Արտաքուստ դրան պետական կարևորություն են հաղորդում միայն գեղեցիկ հագնված 2 ժամապահները։ Ֆինլանդիայի նախագահները սկսել են այստեղ «բնակվել» 1919թ., երբ Ֆինլանդիան Սահմանադրություն ընդունեց և անկախություն ձեռք բերեց։

5. Սակայն նախագահները նախընտրում են բնակվել Մյանտյունիեմի նստավայրում։ Այն կառուցվել է 1993թ.՝ գեղատեսիլ վայրում՝ բույսերով շրջապատված։

6. Վարշավայի նախագահական պալատ, Լեհաստան

Այս շինությունը 400 տարվա պատմություն ունի, սակայն լեհ նախագահների նստավայր է դարձել միայն 1994թ.։ Սենյակներից յուրաքանչյուրում կա մարմարե բուխարի ու ձեռագործ գորգեր։ Ամենագեղեցիկ սենյակն է համարվում Ռոկոկո սրահը, որտեղ երկրի առաջին տիկինն ընդունում է իր հյուրերին։ Պալատը հնարավոր է այցելել շաբաթվա բոլոր օրերին՝ անվճար։

7. Կասա Ռոսադա պալատ, Արգենտինա

Այս հանրահայտ շինության պատշգամբից էր դիմում իր ժողովրդին լեգենդար Էվիտա Պերոնը, սակայն պատշգամբն ունի մեկ այլ պատմություն։ Հենց այս նույն վայրից 1982թ. Արգենտինան պատերազմ հայտարարեց Մեծ Բրիտանիային՝ Ֆոլկլենդյան կղզիների պատճառով։ Վարդագույն ներկված նախագահական նստավայրը բաց է այցելուների համար միայն կիրակի օրերին։

8. Լա Մոնեդա պալատ, Չիլի

Որպես Չիլիի ղեկավարների պաշտոնական նստավայր այս շինությունը սկսել է ծառայել 1846թ.։ Այն կառուցված է նեոկլասիցիզմի ոճով։ Հնեց այստեղ է 1973թ. Աուգուստո Պինոչետը հեղաշրջում իրականացրել, իսկ երկրի սոցիալիստ նախագահ Սալվադոր Ալենդեն ինքնասպան եղել։ Լա Մոնեդան բաց է այցելուների առաջ երկուշաբթիից կիրակի։

9. Մալականանգ պալատ, Ֆիլիպիններ

Այս շքեղ 200-ամյա, սպիտակ ներկված պալատը շատ հաճախ անվանում են ֆիլիպինյան Սպիտակ տուն։ Այստեղ կարելի է տեսնել տարբեր տարիների կառավարած նախագահների ու առաջին տիկինների անձնական իրերը։ Պալատ կարելի է այցելել ամեն օր։

10. Թայբեյի նախագահական պալատ, Թայվան

Այս 6-հարկանի շինությունն ունի 130 մ երկարություն և կառուցվել է արևելյան ոճով։ Դրա կառուցումը սկսվել է 1906թ. և ավարտվել 1919թ.։ 2-րդ աշխարհամարտի տարիներին շինությունը շատ է տուժել, սակայն հաղթանակից 2 տարի անց մեկնարկել են դրա վերականգնման աշխատանքները։ Պալատի դռները բաց են ամեն օր։