Ադրբեջանում փակվել է 40 հազարից ավելի աշխատատեղ

 2015 թվականին Ադրբեջանում 40450 աշխատատեղ է փակվել:

Ինչպես հաղորդում է «Արմենպրես»-ը, այս մասին հայտնում է modern.azլրատավական կայքը` հղում կատարելով Ադրբեջանի պետական վիճակագրական կոմիտեի պաշտոնական հաղորդագրությանը:

Պաշտոնական տվյալներով` անցյալ տարի 40450 վերացված աշխատատեղերի 19,2 տոկոսը փակվել է առեւտրի, փոխադրամիջոցների վերանորոգման բնագավառում, 15,5 տոկոսը` տրանսպորտի եւ պահեստային տնտեսության, 8,3 տոկոսը` շինարարության, 6,4 տոկոսը` պետական կառավարման, պաշտպանության եւ  սոցիալական ապահովման, 5,5 տոկոսը` վերամշակող արդյունաբերության, 4,7 տոկոսը` մասնագիտական, գիտական եւ տեխնիկական գործունեության բնագավառներում:

Ադրբեջանական ԶԼՄ-ների համաձայն` անցյալ տարվանից նավթի համաշխարհային գների արագորեն նվազման, ադրբեջանական ազգային արժույթի` մանաթի փոխարեժքը 100 տոկոսով ընկնելու հետեւանքով հիմնականում նավթարդյունաբերությունից կախված Ադրբեջանում փակվել են մեծ թվով պետական եւ մասնավոր ձեռնարկություններ եւ հաստատություններ, ինչի հետեւանքով վերացվել են հարյուր հազարավոր աշխատատեղեր:

Marja.az լրատվական կայքն ավելի վաղ հայտնել էր, որ 2016 թվականի հունվար-փետրվարին Ադրբեջանի ՀՆԱ-ն 40 տոկոսով նվազել է, Ադրբեջանի արտաքին առեւտրաշրջանառությունը մոտ կիսով չափ կրճատվել է, Ադրբեջանի տնտեսությունն սկսել է արագորեն անկում ապրել, վարկային փոխառուների թիվը հասել է 2,6 մլն մարդու:

Ադրբեջանի արտահանման 95 տոկոսը կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձեւավորվում է էներգակիրների արտահանումից ստացվող եկամուտների հաշվին: