«Արմմոնո» փառատոնը կմեկնարկի Հայկ Պետրոսյանի «Եթե ես լինեի ՊաՊա» մոնոներկայացմամբ

«Արմմոնո» միջազգային թատերական ամենամյա 14-րդ փառատոնը կբացվի դերասան Հայկ Պետրոսյանի «Եթե ես լինեի ՊաՊա» մոնոներկայացմամբ: Ապրիլի 29-ից մայիսի 3-ն անցկացվելիք թատերական տոնը կցուցադրի 26 ներկայացում:

«Փառատոնի նկատմամբ հետաքրքրությունը տարեցտարի ավելանում է: Կազմակերպիչները բավական հետաքրքիր են դարձրել այն. դրա մասին վկայում են հանրության արձագանքները: Այն յուրաքանչյուր տարի փորձում է մեկ երկրի հետ ծրագիր ներկայացնել. այս տարի փառատոնը կարևորվում է լեհական ծրագրով»,-«Արմենպրես»-ի փոխանցմամբ`փառատոնի մեկնարկին նվիրված ասուլիսի ընթացքում այս մասին նշեց ՀՀ մշակույթի նախարարի տեղակալԱրթուր Պողոսյանը:

ՀՀ-ում Լեհաստանի Հանրապետության արտակարգ և լիազոր դեսպան Եժի Մարեկ Նովակովսկին էլ ընդգծեց, որ թատերասերները հնարավորություն կունենան դիտել Տադեուշ Ռուժևիչի «Զվարճալի ծերունին» ներկայացումը:

Նախատեսվում է 2 մոնոներկայացման ցուցադրություն Լեհաստանից և մեկ հայ-լեհական համատեղ մոնոներկայացման բեմադրություն-առաջնախաղ («Զվարճալի ծերունին»): Կանցկացվի նաև դասախոսություն՝ նվիրված լեհ հեղինակի կյանքի և ստեղծագործական ժառանգությանը: Բացի այդ, Երևանում բեմադրված հայ-լեհական համատեղ մոնոներկայացումը (բեմադրիչ՝ Հրաչյա Ղազարյան, դերակատար՝ Արա Ասատուրյան) հրավիրված է Վրոցլավ՝ մասնակցելու «Վրոցլավը՝ եվրոպական մշակութային մայրաքաղաք» նախագծին:

«Մեր հյուրերից ոչ ոք չհրաժարվեց գալ Հայաստան. դա մեզ համար նույնպես կարևոր է: Մենք մեր բոլոր մասնակիցների հետ կգնանք նաև Հայոց ցեղասպանության հուշահամալիր: Այս փառատոնն առաջին հերթին հայաստանյան հանդիսատեսի համար է: Բացի լեհական ծրագրից, հատուկ ծրագրով կանդրադառնանք Հայաստանի Հանրապետության անկախության 25-ամյակին»,-տեղեկացրեց «Արմմոնո» միջազգային թատերական փառատոնի տնօրեն Մարիաննա Մխիթարյանը:

ՀՀ առաջին տիկին Ռիտա Սարգսյանի բարձր հովանու ներքո, ՀՀ մշակույթի նախարարության և Հայաստանի թատերական գործիչների միության աջակցությամբ`ապրիլի 29-ին կմեկնարկի «Արմմոնո» միջազգային թատերական ամենամյա 14-րդ փառատոնը: Փառատոնի շրջանակում կցուցադրվի 26 ներկայացում (Մեծ Բրիտանիա, Շվեյցարիա, Ֆրանսիա, Իսրայել, Բելառուս, Լեհաստան, Լիտվա, Ռուսաստան, Վրաստան և Հայաստան):  Այս տարի կցուցադրվեն բազմատեսակ մոնոներկայացմումներ՝ մոնոպար, մոնոմնջախաղ, մոնոդրամա, մոնոստենդափ և այլն:

«Արմմոնո-2016» փառատոնի պատվավոր հյուրերի շարքում են Նինա Մազուրը (ՅՈՒՆԵՍԿՕ-ի մոնոներկայացումների միջազգային ֆորումի համանախագահ), մոնոփառատոնի տնօրեններ Վեցլավ Գերասը (Լեհաստան), Իոլանտա Սուտովիչը (Գերմանիա), Մարիա Տանանան (Լիտվա), Վյաչեսլավ Տերեշչենկոն (Ռուսաստան), Անդրեյ Նովիկովը (Բելառուս), Ալեքսանդրաս Ռուբինովասը (Լիտվա), ինչպես նաև անվանի փորձագետներ Մայքլ Կայթը (Իսրայել), Նատալյա Ցվարցելիձեն (Վրաստան):

«Արմմոնո» առաջին միջազգային թատերական փառատոնը տեղի է ունեցել 2003թ. սեպտեմբերի 24-ին: Փառատոնի հիմնադիրն է ՀԹԳՄ նախագահ Հակոբ Ղազանչյանը: 2005թ. «Արմմոնոն» վերանվանվել է և դարձել «Շեքսպիրյան» փառատոն: Սակայն բազմաթիվ թատերասերների խնդրանքով Հ. Ղազանչյանը կրկին վերադարձրեցնախկին անվանումն ու առանձնացրեց «Շեքսպիրյան» փառատոնը: 2009թ. սկսած՝ մոնոներկայացումների փառատոնը կրեց նախկին անունը՝ «Արմմոնո»: 2009թ.փառատոնն ընդլայնեց իր աշխարհագրական սահմանները. այն անցկացվեց ոչ միայն մայրաքաղաքում, այլև Սյունիքի մարզում: 2009-ից «Արմմոնո» թատերական փա ռատոնի տնօրենը Մարիաննա Մխիթարյանն է: