Մասնագետները քննարկում են գիտության և տեխնոլոգիաների փոխշահավետ գործակցության հարցերը

 Գիտության բնագավառի և ՏՀՏ հատվածի ներկայացուցիչները մասնակցում են «Գիտության և տեխնոլոգիաների մերձեցում» թեմայով երկօրյա գիտաժողովին: Գիտությունների ազգային ակադեմիայում ընթացող գիտաժողովին մասնակցում են նաև արտասահմանում հաջողության հասած հայազգի մասնագետներ:

«Արմենպրես»-ի փոխանցմամբ` գիտաժողովի նպատակն է խրախուսել տեղեկատվական տեխնոլոգիաների ոլորտում գիտության և արդյունաբերության համագործակցությունը` ստեղծելով մասնագիտական բազմապրոֆիլ հարթակ: Մասնագետների դիտարկմամբ` հարթակը ՏՏ ոլորտի գիտաշխատողներին հնարավորություն կտա ներկայացնել իրենց կողմից իրականացվող ու կիրառական հետաքրքրություն ներկայացնող հետազոտությունների արդյունքները:

ՀՀ ԳԱԱ նախագահ Ռադիկ Մարտիրոսյանը նկատեց, որ հատկապես ապրիլյան քառօրյա պատերազմից հետո խիստ արդիական է դարձել գիտության և տեխնոլոգիաների համատեղ գործելու հարցը: «Գիտությունն ինչ կարող է տալ մեր երկրի պաշտպանության խնդիրների իրականացման գործում. այս հարցն է ամենից շատ հնչում այս օրերին: Այն ուղղությունը, որին նվիրված է այս գիտաժողովը, Հայաստանում ամենազարգացող գիտական ճյուղերից է, ամբողջ աշխարհում է դա այդպես: Դժվար է այսօր պատկերացնել կյանքի բնագավառ, որտեղ տեղեկատվական ու հեռահաղորդակցական տեխնոլոգիաների ձեռքբերումները չ օգտագործվեն»,-ասաց ակադեմիկոսը:

ՀՀ էկոնոմիկայի նախարարության տեխնոլոգիկան զարգացման վարչության պետ Ռուբեն Գևորգյանը նշեց, որ իրենց վարչությունը բոլորովին վերջերս է ստեղծվել` մեկ տարի առաջ` նպատակ ունենալով ստեղծել պայմաններ, որպեսզի գիտական արդյունքը հասնի շուկա: Նրա խոսքով` բազմաթիվ քննարկումների ժամանակ հանգել են այն կարծիքին, որ գլոբալ արդյունքի հասնելու համար բավարար չէ ունենալ Հայաստանում ու սփյուռքում, տարբեր ոլորտներում գործունեություն ծավալող մասնագետներ, այլ ամենամեծ խնդիրը նրանց միջև կապի ապահովումն է: «Մեր ողջ խնդիրն այդ ողջ ներուժը համախմբելն է: Հետևաբար, մենք կարևորում ենք միավորված հարթակի ստեղծումը, որի շարժիչ ուժը կլինի նորարարությունը»,-ասաց Ռուբեն Գևորգյանը: Պաշտոնյան շեշտեց, որ ստեղծվելիք հարթակը պետք է լինի  գործիք թե գիտնականների, թե արդյունաբերողների համար:

Գիտաժողովի շրջանակում ՏՏ ոլորտի գիտության, արդյունաբերության և պետական կառույցների անդամները ներկայացնում են իրենց ձեռք բերած արդյունքները, առկա բաց խնդիրները, ինչպես նաև հնարավոր համագործակցության ուղիները մի քանի ուղղություններով:

Գիտաժողովը կազմակերպել է ՀՀ ԳԱԱ ինֆորմատիկայի և ավտոմատացման պրոբլեմների ինստիտուտը ՀՀ Գիտությունների ազգային ակադեմիայի, ՀՀ ԿԳՆ Գիտության պետական կոմիտեի, Երիտասարդ գիտնականների աջակցության ծրագրի, Հայաստանի երիտասարդական հիմնադրամի և Ձեռնարկությունների ինկուբատոր հիմնադրամի աջակցությամբ: