Լևոն Զուրաբյանն արտաքին վտանգի առջև իշխանությանը և ընդդիմադիրներին համախմբվելու կոչ է անում

Ազգային ժողովի ՀԱԿ խմբակցության ղեկավար Լևոն Զուրաբյանը Արցախի և Հայաստանի համար ստեղծված ծանր պայմաններում իշխանություններին և ընդդիմադիր քաղաքական ուժերին միասնականության կոչ է անում: Ազգային ժողովում խորհրդարանական ճեպազրույցերի ժամանակ ՀԱԿ խմբակցության ղեկավարը նշեց, որ առաջիկա ամիսները վճռորոշ են լիելու Հայաստանի և Արցախի համար՝ նկատելով, որ թե իշխանությու նը, թե որոշ ընդդիմադիր քաղաքական ուժեր պետք է ավելի լուրջ մոտենան այս ամենին և գիտակցեն, թե ինչ է կատարվում: «Ամենակարևոր խնդիրը, որ այս պայմաններում մենք պետք է լուծենք, մեր միասնականությունն է: Սակայն միասնականությունը միակողմանի չի լինում և ոչ էլ խոսքով է լուծվում: Դա առաջին հերթին գործ է: Այս առումով ավելի շատ գործ պետք է անեն իշխանությունները: Ընդդիմությունն այդ միասնականության առումով իր գործն արդեն արել է, իսկ իշխանությունները դա պետք է ցույց տան գործով, ոչ թե խոսքով»,-«Արմենպրես»-ի հաղորդմամբ՝ նշեց Զուրաբյանը:

Նրա խոսքով՝ այս պահին պետք չէր զբաղվել Ընտրական օրենսգրքով՝ միաժամանակ նկատելով, որ այդ հարցով զբաղվել են միայն նրա համար, որ 2017թ. նշանակված են խորհրդարանական ընտրություններ, իսկ նոր Ընտրական օրենագիրքը պետք է ընդունվի մինչև ընթացիկ տարվա հունիսի 1-ը: «Սա է միակ պատճառը, որ մենք զբաղվում ենք ու պետք է զբաղվենք Ընտրական օրենսգրքով»,- ասաց պատգամավորը:

Զուրաբյանի գնահատմամբ՝ իշխանությունները և ըննդիմությունը պետք է հասկանան, որ այս պահին լուծվում է ոչ թե իրենց կուսակցությունների շահը, գոյատևել կամ չգոյատևելու հարցը, այլ Հայաստանի և Արցախի ճակատագիրը: Պատգամավորը նշեց, որ ցանկանում է ուղերձ հղել իշխանություններին և որոշ ընդդիմադիր ուժերի: Նրա խոսքով՝ Ընտրական օրենսգրքի քվեարկության ընթացքում խորհրդարանի ղեկավարությունը թույլ է տվել կանոնակարգի խախտում, երբ քվեարկությունից առաջ թույլ չի տվել պատգամավորներին ելույթներ ունենալ վարման կարգի վերաբերյալ: «Մենք իշխանություններին  կոչ ենք անում հրաժարվել նման գործելաոճից, այլապես որևէ հավատ հանրության մեջ չի լինի, որ այս բարդ պայմաններում քաղաքական ուժերի միասնականությունը կարող է կայանալ»,- ընդգծեց նա:

Պատգամավորը հնչեցրեց նաև ուղերձ ուղղված ընդդիմադիր ուժերին: Նա որոշ ընդդիմադիր քաղաքական ուժերի կոչ արեց զերծ մնալ իրական ընդդիմություն որոշելու քայլերից: «Ես ցանկանում եմ հիշեցնել, որ իրական ընդիդմությանը միայն մեկ չափանիշ կա: Իրական է այն ընդդիմությունը,  որն իր քննադատության թիրախ համարում է միայն իշխանությունները: Դուք երբեք չեք տեսնի, որ մենք զբաղվենք որևէ ընդիմադիր քաղաքական ուժի քննադատությամբ: Մենք քննադատում ենք միայն իշխանություններին: Ճիշտ է՝ ապրիլի 2-ից հետո մենք ավելի զուսպ ենք դարձել, թեկուզ այդ զուսպ քննադատության թիրախը լինելու է, կա,  եղել է իշխանությունը: Սա շատ հստակ չափանիշ է: Ազգային միասնականություն նշանակում է առաջին հերթին այդպիսի գզվռտոցից զերծ մնալը՝ թեկուզ ընդդիմության շարքերում: Մենք պետք է հասկանանք, որ Ընտրական օրենսգրքի ընդունումը ազգային միասնականության այս գործընթացում պետք է դառնա ոչ թե կռվախնձոր, պետք է դառնա ոչ թե մանր մունր քաղաքական ինտրիգների դաշտ, այլ առաջին համերաշխության տարրը դառնա այդ ազգային միասնականության ճանապարհին: Դրա համար ենք մենք պնդել, որ կոնսենսուս լինի: Սա կարող է դառնալ մի կարևոր բաղադրիչ, որ գործով կապացուցի հայ ժողովրդի, քաղաքական ուժերի միասնականությունը արտաքին վտանգների առջև: Բոլոր քաղաքական ուժերին կոչ եմ անում զերծ մնալ մանր քաղաքական կոնյունկտուրայով թելադրվող քայլերից և փորձել հասնել կոնսենսուսի, ոչ մեկը թող չթաղի այդ կոնսենսուսի գաղափարը, մենք դրա կարիքն ունենք»,- եզրափակեց ՀԱԿ խմբակցության ղեկավարը: