ՄԱԿ-ի կենտրոնակայանում դարձյալ խոսել են Ադրբեջանում տիրող բռնապետությունից

ՄԱԿ-ի Նյու Յորքի կենտրոնակայանում Մեծ Բրիտանիայում գտնվող «Konkordia Forum»-ի կազմակերպած` «Հանուն փոփոխությունների ֆորում» խորագրով միջոցառման ժամանակ, որին մասնակցել են աշխարհի տարբեր երկրներից ժամանած մոտ 200 ճանաչված դեմքեր, քաղաքական-հասարակական եւ գլոբալ հարցերին զուգահեռ խոսել են նաեւ Ադրբեջանում տիրող բռնապետությունից:

Այս մասին, ինչպես հաղորդում է «Արմենպրես»-ը, հայտնում է «Ազադլըգ» թերթը` նշելով, որ «Հանուն փոփոխությունների ֆորում»-ի առաջին միջոցառումը 2015 թվականին անցկացվել է Լոնդոնի «Gladstone» գրադարանում:

Ըստ թերթի` ֆորումին մասնակցել է նաեւ ամերիկաբնակ ծագումով ադրբեջանցի հասարակական-քաղաքական ակտիվիստ Էմիլ Իսմայիլը, որը ԱՄՆ կոնգրեսականներ Քեյթ Էլիսոնի եւ Իվետ Կլարկի հետ զրույցում քննարկել է Ադրբեջանում ժողովրդավարության վիճակը, մարդու իրավունքների խախտումների ու ապօրինի ձերբակալությունների հետ կապված հարցեր:

ԱՄՆ-ի նախագահի թեկնածու Հիլարի Քլինթոնի «աջ ձեռք» համարվող Հումա Աբեդին հետ զրույցում Էմիլ Իսմայիլը նրանից խնդրել է Հիլարի Քլինթոնի նախագահ ընտրվելու դեպքում ժողովրդավարության եւ մարդու իրավունքների բնագավառում  լինել ադրբեջանական ժողովրդի կողքին:

Էմիլ Իսմայիլը Հումա Աբեդինին տեղեկացրել է Ադրբեջանում քաղբանտարկյալների խնդրի, ապօրինի դատարանների եւ ընդդիմության առաջնորդների նկատմամբ հետապնդումների մասին:

Ֆորումի ժամանակ ադրբեջանցի ակտիվիստն Ադրբեջանում մարդու իրավունքների աղետալի վիճակը քննարկել է նաեւ «Ալ Ջազիրա» հեռուստաալիքի հայտնի հաղորդավար Մեհդի Հասսանի հետ: Հասսանից նա խնդրել է իր հաղորդումներում ուշադրություն դարձնել Ադրբեջանում ապօրինի ձերբակալությունների եւ ժողովրդավարության հարցերին:

Մեհդի Հասսանն իր հերթին ասել է, որ տեղեկացված է Ադրբեջանում բռնապետություն լինելու մասին եւ ափսոսանք հայտնել, որ նման պայմաններում ԱՄՆ-ը ջերմ հարաբերություններ ունի Ադրբեջանի բռնապետ Իլհամ Ալիեւի ռեժիմի հետ:

Նա նաեւ հայտնել է, որ «Ալ Ջազիրա» հեռուստաալիքում ավելի շատ ուշադրություն է հատկացնելու Ադրբեջանի հետ կապված հարցերին:

Ադրբեջանցի ակտվիստը ֆորումի ժամանակ հանդիպել եւ Ադրբեջանում բռնապետական ռեժիմի մասին զրուցել է նաեւ Բրուքլինի քաղաքապետ Էրիկ Ադամսի, ԱՄՆ-ի ազգային անվտանգության դեպարտամենտի եւ ԱՄՆ-ի պետքարտուղարության բարձրաստիճան աշխատակիցների ու «Coca Cola International» ընկերության նախագահ Ահմեթ Բոզորի հետ: