ԵԽԽՎ-ն Թուրքիայի պահանջով իր կայքից հանել է ցեղասպանությանը նվիրված համերգի մասին լուրը

Ռուսական Առաջին ալիքի կայքից տեղեկանում ենք, որ Դրեզդենի սիմֆոնիկ նվագախումբը որոշակի խնդիրների է բախվել Հայոց ցեղասպանությանը նվիրված համերգ կազմակերպելու պատճառով։ Անկարան, որը 20-րդ դարի սկզբին տեղի ունեցած հայերի կոտորածի մեջ իրեն մեղավոր չի համարում, իր դժգոհությունն է արտահայտել այդ նախագծի նկատմամբ։ Արդյունքում երաժիշտներին ֆինանսավորող Եվրահանձնաժողովը թուրքական կողմի համար փոխզիջումների է գնացել։

Նշենք, որ երեկոյին հնչելու է հայ կոմպոզիտոր Վաչե Շարաֆյանի ստեղծագործությունը՝ «Սուրգիտե Գլորիա» կոնցերտը։ Վերջինս հատուկ Գերմանիա էր գնացել փորձերին ներկա գտնվելու համար։ Այդ ստեղծագործությունը նա գրել է Հայոց ցեղասպանության մասին պատմող գրքի ազդեցության տակ։

«Ինձ պետք չէ համոզել՝ եղե՞լ է դա, թե՞ ոչ, որովհետեւ դրա մասին ինձ իմ պապերն են պատմել։ Դա յուրաքանչյուր ընտանիքի, յուրաքանչյուր հայի ցավն է», - պատմել է կոմպոզիտորը։ Արհամարհելով բազմաթիվ վկայություններն ու պատմական փաստաթղթերը՝ Թուրքիան մինչ օրս չի ընդունել ցեղասպանության մասին փաստը։ Արդյունքում՝ իրերն իրենց անունով կոչել եւ հաշտության ազդակ տալ փորձել են մշակույթի մարդիկ։ Այդպես ստեղծվել է «Աղետ» նախագիծը։ Այն միավորել է Դրեզդենի սիմֆոնիկ նվագախմբի, Հայաստանի, Թուրքիայի եւ նախկին Հարավսլավիայի երաժիշտներին։ Որպես հովանավոր է հանդես եկել Եվրահանձնաժողովը։ Եվ ամեն ինչ լավ էր ընթանում մինչ թուրքական կողմի դիտողությունը:

Անկարան վերջնագրի տոնով պահանջել էր Եվրահանձնաժողովի պաշտոնական կայքից հանել «Աղետ» նախագծի վերաբերյալ տեղեկատվությունը, որտեղ «ցեղասպանություն» բառն էր օգտագործվել։ Եվրոպացի բյուրոկրատներն անմիջապես կատարել էին պահանջը։

Քրիստինա Տեր-Մաթեւոսյան