Շվեյցարիայի հատուկ ծառայությունները շուրջ 400 ենթադրյալ իսլամականի են բացահայտել

Շվեյցարիայի հատուկ ծառայությունները բացահայտել են շուրջ 400 անձի, որոնք համացանցում կապ են պահում ծայրահեղական իսլամականների հետ: Այս մասին մայիսի 2-ին հաղորդել է Շվեյցարիայի հետախուզական ծառայությունը:

Նաեւ տվյալներ են պարզվել Շվեյցարիայի ավելի քան 70 բնակչի մասին, որոնք մեկնել են հակամարտությունների գոտիներ՝ «Իսլամական պետություն» ահաբեկչական խմբավորման զինյալների շարքերում պատերազմելու:

«Անվտանգությունը Շվեյցարիայում 2016» զեկույցը ներկայացնելիս Շվեյցարական համադաշնության հետախուզական ծառայության տնօրեն Մարկուս Զայլերը նշել է, որ ԻՊ-ի կողմից վերահսկվող տարածքներ մեկնած 73 ջիհադականներից 12-ը վերադարձել են Շվեյցարիա: Նա ընդգծել է, որ այդ անձինք կոնկրետ վտանգ են ներկայացնում երկրի ներքին անվտանգության համար: Նրանց նկատմամբ քրեական գործեր են հարուցվել:

Զեկույցի համաձայն, չնայած Շվեյցարիան եւ արտերկրում նրա շահերն ԻՊ-ի կողմից պատվիրվող կամ կազմակերպվող ահաբեկչությունների համար առաջնահերթ թիրախ չեն, սակայն երկիրն արեւմտյան աշխարհի մաս է կազմում, որը ծայրահեղականներն իսլամատյաց են համարում: Ըստ փաստաթղթի հեղինակների, շվեյցարական տարածքում «բարձր մակարդակի վտանգի» ենթակա են ԻՊ-ի դեմ ռազմական կոալիցիայի անդամ երկրների, ինչխես նաեւ Ռուսաստանի, Իսրայելի եւ արաբական պետությունների շահերը:

Ըստ ՏԱՍՍ-ի, Զայլերը նշել է, որ մարտի 22-ին Բրյուսելում տեղի ունեցած ահաբեկչությունները, «ցավոք, անակնկալ չէին»: «Պետք էր դա սպասել: Նոյեմբերին Փարիզում տեղի ունեցած հարձակումներից հետո ահաբեկչության վտանգի մակարդակը Եվրոպայում շարունակում է բարձր մնալ»,- փաստել է շվեյցարական հետախուզության ղեկավարը: