Ռիոյի Օլիմպիական խաղերի անցկացման համար խոչընդոտներ չկան. ՀՀ-ում Բրազիլիայի արտակարգ և լիազոր դեսպան

Ամառային 31-րդ Օլիմպիական խաղերը, որ սկսվելու են ընդամենը 94 օրից՝ տևելով օգոստոսի 5-21-ը, իրենց վրա են սևեռելու աշխարհի ավելի քան 5 միլիարդ մարդկանց ուշադրությունը: Այս և Օլիմպիական խաղերի հետ կապված մի շարք այլ հարցերի մասին «Արմենպրես»-ի մամուլի սրահում խոսեց ՀՀ-ում Բրազիլիայի Դաշնային Հանրապետության արտակարգ և լիազոր դեսպան Էդոսն Մարինյո Դուարտե Մոնտեյրոն:

«Արմենպրես»-ը հաղորդում է, որ դեսպան Մոնտեյրոն վստահ է՝ 31-րդ Օլիմպիական խաղերի կազմակերպումը բավականին մանրակրկիտ մշակվել է, մեծամասշտաբ  նախապատրաստական աշխատանքներ են տարվել և ոչինչ չի կարող խանգարել մարզական խոշոր միջոցառման կազմակերպմանը: Մարզական կառույցների զգալի մասն արդեն պատրաստ է հյուրընկալելու օլիմպիան խաղերի շրջանակներում կայանալիք մրցաշարերը:

«Ոչ Բրազիլիայում ներկա քաղաքական վիճակը, ոչ էլ զիկա համաճարակը չեն կարող խանգարել մարզական տոնի կազմակերպմանը: Բրազիլիան խոշոր միջոցառումներ կազմակերպելու փորձ է ձեռք բերել վերջին տարիներին, այնպես որ մարզական տոնը կայանալու է: Այլընտրանք չկա»,- ասաց դեսպան Մոնտեյրոն՝ հավելելով, որ ցանկանում է Հայաստանի ներկայացուցիչներին միայն օլիմպիական ոսկե մեդալներ:

«Արմենպրես»-ի փոխանցմամբ՝ դեսպան Մոնտեյրոն Օլիմպիական խաղերի ընթացքում գտնվելու է Հայաստանում և երկրպագելու է հայ օլիմպիականնների հաղթանակի համար. «Օլիմպիական ավանում փնտրել և գտել եմ տեղը, որտեղ ելույթ են ունենալու հունահռոմեական ոճի ըմբիշները: Վստահ եմ՝ Հայաստանը կարողանալու է օլիմպիական մեդալներ նվաճել: Միայն ոսկե մեդալներ եմ ցանկանում Հայաստանի ներկայացուցիչներին»:

Խոսելով Օլիմպիական խաղերի շրջանակում Բրազիլիայի կառավարության, ինչպես նաև այլ կազմակերպությունների կատարած ներդրումների մասին՝ դեսպանը նշեց, որ դրանք ժառանգվելու են բրազիլացիներին, ովքեր Օլիմպիական խաղերից հետո կարող են ենթակառուցվածքներին տեր կանգնել այնպես, ինչպես հարկ են համարում: Վերհիշելով 2014 թ. Բրազիլիայում տեղի ունեցած ֆուտբոլի աշխարհի առաջնության օրինակը՝ դեսպանը նշեց. «Օլիմպիական խաղերի համար պատրաստված մարզական կառույցները հետագայում կարող են ծառայել բրազիլացի ժողովրդին: Ֆուտբոլի աշխարհի առաջնությունից հետո, օրինակ, մի շարք կառույցներ դարձան դպրոցներ: Եթե չեմ սխալվում, ներկայում այդպիսի 5 դպրոցներ կան Բրազիլիայում»:

Օլիմպիական խաղերի մարզական նշանակությունը կարևորելով՝ Բրազիլիայի դեսպանն ընդգծեց, որ վերջին տարիներին բրազիլացիները հնարավորինս ավելի են հետաքրքրվում սպորտով. «Եթե նախկինում խնդիր էր դպրոցականներին դպրոցից հետո ընդգրկել մարզական խմբակներում, ապա այսօր կարևոր է, որպեսզի Բրազիլիայի մարզական կյանքում կայունություն լինի: Իհարկե, շատերն են լսում բրազիլացի մարզիկների հաջողությունների մասին, սակայն դրանք պետք է կայուն լինեն: Ոչ միայն նետաձգության, վազքուղային մարզաձևերում, վոլեյբոլում, ֆուտբոլում են հաջողություններ անհրաժեշտ: Մենք ավելին ենք ուզում մեր մարզիկներից, ցանկանում ենք շատ բարձր մակարդակի հասցնել սպորտը մեր երկրում»:

Ավելի քան 12 մլրդ ԱՄՆ դոլար է պահանջվել մարզական ենթակառուցվածքները կարգի բերելու և թարմացնելու, տրանսպորտային նոր, գերժամանակակից համակարգ ստեղծելու համար, որի զգալի մասը եղել է առանձին կազմակերպությունների կողմից: Բրազիլիայի կառավարությունը ևս անմասն չի մնացել. խոշոր ներդրումներ են կատարվել, որոնք հետագայում ծառայելու են երկրի ժողովրդին:

Խոսելով Օլիմպիական խաղերի Ռիոյում անցկացվելու անվտանգության մասին՝ դեսպանը շեշտեց, որ մարզիկների, միջոցառումը լուսաբանող լրագրողների և երկրի հազարավոր հյուրերի համար անվտանգության բարձր մակարդակ է ապահավվել. «47 հազար քաղաքացիական անվտանգության ներկայացուցիչներ և 38 հազար ռազմական անվտանգության ներկայացուցիչներ այդ ընթացքում փորձելու են պաշտպանել մարզական միջոցառմանը մասնակցող թե մարզիկների, թե հյուրերի և թե լրագրողների անվտանգությունը: Մենք չենք թաքցնում, որ Ռիոյում կան մի քանի վտանգավոր թաղամասեր և օրենքի հետ խնդիրներ ունեցող խմբավորումներ, սակայն անհանգստանալու և մտահոգվելու կարիք չկա: Միջոցառման ժամանակ անվտանգության մակարդակը բավականին բարձր կլինի: Արդեն իսկ փորձ ունենք, այնպես որ սա նորություն չի լինի երկրի համար»:

Վերջին տարիներին, ըստ դեսպանի, զգալիորեն նվազել է սպանությունների թիվը երկրում, ինչը դրական միտում է դեպի առավել անվտանգ հասարակություն. «Տարիներ առաջ կարելի էր ասել, թե գրեթե պատերազմական վիճակ էր Ռիոյում՝ մահացությունների մեծ թիվը հաշվի առնելով, սակայն ներկայում շատ բան բարեկարգվել է, դեպի դրական փոփոխության ենթարկվել»:

Մայիսի 3-ին տեղական ժամանակով 10:30-ին Օլիմպիական խաղերի կրակն արդեն ժամանել է Բրազիլիա, ինչը, դեսպանի կարծիքով, բավականին խորհրդանշական է. «Օլիմպիական կրակը շրջելու է Բրազիլիայի 329 քաղաքներով և օգոստոսի 4-ին հասնելու է Ռիո: Օգոստոսի 5-ին մենք ականատես կլինեն Օլիմպիական խաղերի բացման արարողությանը, որը շատ շքեղ կլինի: Թե ինչ կտա աշխարհին Բրազիլիան, կտեսնեք Օլիմպիական խաղերի ընթացքում»:

Հայաստանում Բրազիլիայի դեսպանը կարևորել է նաև սեպտեմբերի 8-ին Ռիոյում մեկնարկող Պարալիմպիկ խաղերի անցկացումը, որոնց մասնակցելու են հազարավոր մարզիկներ, ովքեր հաշմանդամության խնդիրներ ունեն. «Այդ միջոցառումը ևս շատ կարևոր է, այնպես որ չնայած ուշադրությունը սևեռվում է աշխարհի 206 երկրներից ավելի քան 10,900 մարզիկներ հյուրընկալող Օլիմպիական խաղերի վրա, այունամենայնիվ, հազարավոր մասնակիցներ կլինեն նաև Պարալիմպիկ խաղերի ժամանակ»:

Ռիոյում կայանալիք Օլիմպիական խաղերի շրջանակներում սպասվում են 30-ից ավելի մարզական խոշոր մրցաշարեր, որոնք մեկնարկելու են օգոստոսի 5-ին: Միայն ֆուտբոլի օլիմպիական մրցաշարը կմեկնարկի օգոստոսի 3-ին: