Ավտոբուսով Ռուսաստան մեկնող մեր քաղաքացիներն ամեն անցակետում կաշառք են վճարում

«Իրազեկ քաղաքացիների միավորման անդամ» Տաթևիկ Վարդանյանը Ռուսաստանում մեր քաղաքացիների ազատ տեղաշարժի վերաբերյալ հետեւյալ հոդվածով է հանդես եկել:

Նա իր հոդվածում նշել է այն մասին, ռուսական իրավապահ համակարգը թաթախված է կոռուպցիայի մեջ, ինչը թերեւս գաղտնիք չէ ոչ ոքի համար: «Օրերս ԱԺ-ում ՀԱԿ խմբակցության պատգամավոր Լյուդմիլա Սարգսյանը հարց բարձրացրեց «ՌԴ ոստիկանների կողմից մեր քաղաքացիներին ռեկետի ենթարկելու մասին», ինչին ի պատասխան, կառավարության ներկայացուցիչը՝ Տրանսպորտի եւ կապի նախարար Գագիկ Բեգլարյանն ասաց, որ «ՀՀ տարածքից դուրս չեն կարող միջամտել նման հարցերին»: Պարոն Բեգլարյանն իրավացի է, որ չեն կարող միջամտել, բայց մենք շատ արագ քայլերով ինտեգրվում ենք ԵԱՏՄ-ին եւ պարզ չէ, թե ինչպես «կբարեփոխվի» մեր իրավապահ համակարգը` հաշվի առնելով ռուսական փորձը»,- հայտնել է Տաթեւիկ Վարդանյանը:

Ըստ նրա՝ «ռեկետը», որ մասին խոսվում է, մեկ օրինակով կամ մեկ ոստիկանով չի սահմանափակվում՝ դա տեւական ժամանակ գործող անխափան մեխանիզմ է:

Վերը նշվածի կապակցությամբ վերջինս համեմատել է մեր համաքաղաքացիների նկատմամբ վերաբերմունքը ՌԴ-ում եւ Եվրոպայում: Մասնավորապես, անդրադարձել է, թե ինչպես են մեր քաղաքացիները ավտոբուսներով հասնում ռուսական քաղաքներ:

«Բոլորը, ովքեր երբևէ օգտվել են այդ ավտոբուսներից, գիտեն, որ վարորդից կամ վարորդներից բացի, ավտոբուսում միշտ լինում է այսպես կոչված «ուղեկցող»: Վերջինիս պարտականությունն այն է, որ նա ռուսական պետական սահմանակետում տալիս է կաշառք, որպեսզի ավտոբուսն առանց լուրջ զննման հատի սահմանը: Այս քայլը անհրաժեշտություն է, քանի որ մինչև ՌԴ պետական սահմանը հատելը մարդիկ (նաեւ երեխաները), հնարավոր է, որ ավտոբուսի ներսում սպասեն յոթ ժամ եւ ավելի, քանի որ սահմանին շատ լուրջ կուտակումներ են առաջանում: Ուղեկցողը, որպես կանոն, առաջարկում է ուղեւորներին մոտ հարյուրական ռուբլի հավաքել, որպեսզի ավտոբուսը լրացուցիչ մի քանի ժամ չզննվի»,- տեղեկացնում է հոդվածագիրը:

Բացի այդ էլ ճանապարհին հանդիպող ամեն ոստիկան հարկ է համարում անտեղի կանգնեցնել հայկական պետհամարանիշներով երթեւեկող ավտոբուսը: Ուղեկցողն իջնում է ավտոբուսից, վճարում որոշակի գումար (500-1000 ռուբլի) եւ այդպես՝ ամբողջ ճանապարհը: «Ոստիկաններն այնքան հաճախ են կանգնեցնում մեքենան, որ վարորդը անկեղծ զարմանում է, երբ ինչ-որ ոստիկան կանգնելու ազդանշան չի տալիս»,- հավելել է հեղինակը:

Պետական սահմանից զատ՝ Ռուսաստանի մարզերի միջեւ եւս տեղակայված են անցակետեր, որտեղ պարտադիր պետք է կանգ առնել: Այստեղ կաշառքի չափը կախված է մարզից եւ ուղեկցողի բանակցային հմտություններից: Ամենակաշառակերը Կաբարդինո-Բալկարիայի մարզային սահմանային ծառայության աշխատակիցներն են: Նրանք նույնիսկ բավական մեծ կաշառք (մոտ 6000 ռուբլի) վերցնելուց հետո կարող են ինքնաձիգներով մտնել ավտոբուս եւ ձեւական խուզարկություն իրականացնել: Այդ կաշառքների մեծ մասը վճարում է ուղևորափոխադրողը (եւ դրա գինը ներառված է տոմսում), իսկ մի մասը, ինչպես նշվեց, տեղում հավաքում են ուղեւորներից:

Ի տարբերություն Ռուսաստանի՝ Եվրամիության երկրներ մեկնելիս Հայաստանի քաղաքացիներին անհրաժեշտ է վիզա: Չնայած վիզայի ստացման բարդություններին, այն ձեռք բերելուց եւ Եվրամիության տարածք մուտք գործելուց հետո տեղաշարժի ոչ մի բարդություն չի առաջանում:

Եվրոպական ավտոբուսներում եւս կա ուղեկցորդ, սակայն նրանք սուրճ, թեյ եւ քաղցրավենիք բաժանող ու ժպտացող մարդիկ են, ոչ թե կաշառք բաժանող:

«Ոչ մի ոստիկանի մտքով չի անցնում անիմաստ կանգնեցնել ուղեւորներ փոխադրող ավտոբուսը Գերմանիայում, եթե այն չեխական համարներով է եւ հնարավոր չի պատկերացնել ոչ մի չեխ ուղեկցողի գերմանացի ոստիկանին կաշառք տալիս: Եթե նույնիսկ ոստիկանը ցանկանում է ստուգել ուղեւորների փաստաթղթերը, դա արվում է բավական արագ, առանց ինքնաձիգների, հարգալից, ժպիտով եւ տեւում է 10 րոպե»,- հայտնում է Տաթեւիկը:

Ըստ նրա՝ այս պարզ օրինակը ցույց է տալիս ԵԱՏՄ-ի եւ ԵՄ-ի միջեւ եղած մեծ տարբերությունը: Նրա համոզմամբ՝ Հայաստանի ու Վրաստանի իրավապահներն առավելապես եվրոպական օրինակին են հետեւում: «Սակայն, ի տարբերություն Վրաստանի, դաշինքներ ենք կազմում երկրների հետ, ուր մեր քաղաքացիների նկատմամբ կա ակնհայտ խտրական վերաբերմունք, իսկ կոռուպցիան չափ եւ սահման չի ճանաչում»- վերջում հավելել է նա:

Քրիստինա Տեր-Մաթեւոսյան