Ֆուտբոլի Չեմպիոնների լիգայի եզրափակիչը կլինի իսպանական

Չեմպիոնների լիգայի կիսաեզրափակիչ փուլի երկրորդ խաղում Մադրիդի «Ռեալ»-ը սեփական հարկի տակ նվազագույն հաշվով պարտության մատնեց անգլիական «Մանչեսթեր Սիթի»-ին և դուրս եկավ եզրափակիչ:

Ինչպես հաղորդում է «Արմենպրես»-ը, ողջ խաղի ընթացքում «Ռեալ»-ը լուրջ առավելություն ուներ մրցակցի նկատմամբ: Խաղի հենց մեկնարկային րոպեներից իսպանական ակումբի ֆուտբոլիստները խաղը իրենց ձեռքը վերցրին՝ մրցակցին թույլ չտալով անգամ վտանգավոր պահ ստեղծել Կեյլոր Նավասի դարպասի մոտ:

Հանդիպման 20-րդ րոպեին «Ռեալ»-ի հարձակվող Գարեթ Բեյլն աջ եզրից ներխուժեց տուգանային հրապարակ և փորձեց հարվածային դիրք դուրս բերել Քրիշտիանու Ռոնալդուին, սակայն գնդակը դիպավ «Մանչեսթեր Սիթի»-ի կիսապաշտպան Ֆերնանդոյի ոտքին և հայտնվեց դարպասում:

Բաց թողած գնդակից հետո էլ անգլիական ակումբի ֆուտբոլիստների մոտ ակտիվություն չէր նկատվում: Նրանք հիմնականում փորձում էին խաղալ հակագրոհների հիման վրա և փորձում էին երկար փոխանցումներով հարվածային դիրք դուրս բերել հարձակվող Սերխիո Ագուերոյին, սակայն վերջինս գտնվում էր մադրիդյան ակումբի պաշտպան Պեպեյի վերահսկողության տակ: Առաջին խաղակեսի վերջում անգլիական ակումբը լավ հնարավորություն ստացավ հաշիվը հավասարեցնելու համար, սակայն Ֆերնանդոյի հարվածից հետո գնդակը դիպավ ուղղահայաց դարպասաձողին և դուրս եկավ դաշտից:

Երկրորդ խաղակեսն էլ անցավ «Ռեալ»-ի բացահայտ առավելությամբ: Արքայական ակումբի ֆուտբոլիստները մի քանի լուրջ վտանգավոր պահեր ստեղծեցին մրցակցի դարպասի մոտ, սակայն իրեն վստահ էր զգում անգլիական ակումբի դարպասապահ Ջո Հարթը: Հանդիպման 70-րդ րոպեին հաշիվը կարող էր կրկնապատկել Գարեթ Բեյլը, սակայն անկյունայինի խաղարկումից  և նրա գլխով հարվածից հետո գնդակը հետ մղվեց հորիզոնական դարպասաձողից: Անգլիական թիմի ֆուտբոլիստներն այդպես էլ չկարողացան ուշքի գալ և խփել այդքան անհրաժեշտ մեկ գնդակը: Արդյունքում  «Ռեալ»-ը հաղթեց նվազագու յն հաշվով և, հաշվի առնելով, որ Անգլիայում թիմերի առաջին դիմակայությունն ավարտվել էր ոչ ոքի՝ 0:0 հաշվով,  դուրս եկավ եզրափակիչ:

Չեմպիոնների լիգայի եզրափակիչ փուլում կմրցեն երկու իսպանական ակումբներ՝ Մադրիդի «Ռեալ»-ը և Մադրիդի «Ատլետիկո»-ն: Եզրափակիչ հանդիպումը կկայանա մայիսի 28-ին Միլանի «Սան Սիրո» մարզադաշտում: 2014թ. Չեմպիոնների լիգայի եզրափակիչ խաղում ևս միմյանց դեմ մրցել են մադրիդյան երկու թիմերը: Այդ հաջողությունն ուղեկցել է «Ռեալ»-ին: Հանդիպման հիմնական ավարտվել է ոչ ոքի 1:1 հաշվով, իսկ լրացուցիչ ժամանակում «Ռեալ»-ը կարողացել է ևս երեք գնդակ ուղարկել մրցակցի դարպասը և հաղթանակ տանել 4:1 հաշվով: