Նովոմոսկովսկի մեր հայրենակիցներն աջակցություն են հատկացրել հայ զինծառայողների յոթ ընտանիքի

Ռուսաստանի Դաշնության Նովոմոսկովսկ քաղաքում բնակվող մեր հայրենակիցներ Արթուր Կարապետյանը, Կարապետ Մարտիրոսյանը եւ Արթուր Բավեյանը դրամական աջակցություն են հատկացրել ապրիլյան հերոսամարտերում զոհված հայկական բանակի զինծառայողների յոթ ընտանիքի:

Ինչպես «Արմենպրես»-ին տեղեկացրեց բարեգործական ձեռնարկով հայրենիքում գտնվող Արթուր Կարապետյանը, իրենց կողմից դրամական աջակցություն է հատկացվել ապրիլյան հերոսամարտերում զոհված վեց եւ վիրավորված մեկ զինծառայողի ընտանիքների: «Հայաստան ենք ժամանել երեքով եւ Կարապետ Մարտիրոսյանի ու Արթուր Բավեյանի հետ այցելում ենք մեր հերոս հայորդիների ընտանիքներ՝ անձամբ սփոփելով նրանց: Եղել ենք Շիրակի մարզի Մեծ Մանթաշ գյուղում, հերոսամարտե րում զոհված սպաներ Արման Անդրեասյանի, Արգիշտի Գաբոյանի եւ Բենիամին Եղոյանի, Երեւանի Քանաքեռ թաղամասից  շարքային Տիգրան Բերակչյանի, Արագածոտնի մարզի   Կարմրաշեն գյուղից շարքային Ռաֆիկ Հակոբյանի, Արագածոտնի մարզի Արուճ գյուղից վիրավոր զինծառայող Մայիս Գեղամյանի եւ Գեղարքունիքի մարզի Երանոս գյուղից զոհված Նորիկ Սարգսյանի ընտանիքներում: Վեց ընտանիքների հատկացրել ենք հիսուն հազարական ռուսական ռուբլի, իսկ  Նորիկ Սարգսյանի ընտանիքին՝ վաթսուն հազար ռուսական ռուբլի: Նովոմոսկովսկում ապրող մեր հայրենակիցները չեն կարող իրենց հանգիստ զգալ, երբ մեր հայրենիքը վտանգի մեջ է, երբ թշնամին սպառնում է մեր գոյությանը: Մենք պետք է միջոց ու ժամանակ գտնենք՝ մեր հայրենիքին ամեն կերպ օժանդակելու, մեր երկրի պաշտպանության ամրապնդմանն աջակցելու համար»,-նշեց Արթուր Կարապետյանը:

 Նովոմոսկովսկում բնակվող մեր հայրենակիցներին ընդունեց Գեղարքունիքի մարզպետի տեղակալ Անդրանիկ Հակոբյանը: Մարզի ղեկավարության կողմից շնորհակալական խոսքփոխանցելով ՝ մարզպետի տեղակալը նշեց, որ հայ ժողովրդի միասնությունը դրսեւորվում է ոչ միայն առաջնագծում, այլ նաեւ համայն աշխարհում սփռված հայկական համայնքներում, ինչն անգնահատելի ձեռքբերում է:

Խոսրով Խլղաթյան