Հայաստանյան կուսակցությունները կարևորում են եվրոպական քաղաքական կառույցների հետ համագործակցությունը

Հայաստանյան կուսակցությունները կարևորում են համագործակցությունը եվրոպական քաղաքական կառույցների հետ: ԵԺԿ-ի հիմնադրման 40-ամյակին նվիրված «Եվրոպական քաղաքական դաշտը և հայաստանյան կուսակցությունները» կլոր-սեղան քննարկման ժամանակ Ազգային ժողովի «Օրինաց երկիր» խմբակցության անդամ Մհեր Շահգելդյանը նշեց, որ ԵԺԿ-ն իր ներդրումն ունի եվրոպական քաղաքական դաշտի ձևավորման գործընթացում: Խոսելով եվրոպական քաղա քական կառույցների հետ «Օրինաց երկիր» կուսակցության փորձից` Մհեր Շահգելդյանը նշեց, որ 2006 թվականին ՕԵԿ-ն անդամագրվեց «Քիրստոնեա- դեմոկրատական և ժողովրդական կուսակցությունների համաշխարհային ինտերնացիոնալ»-ին:

«Այդ ընթացքում մենք կապեր հաստատեցինք եվրոպական մեր այն գործընկերնրի հետ, որոնք այսօր անդամակցում են ԵԺԿ-ին: Հիմքը գաղափարական մոտեցումներն են: Համագործակցությունը տարբեր եվրոպական գործընկերների հետ բերեց փորձի փոխանակման հատկապես կուսակցական շինարարության գործընթացում: Մեզ  համար կարևոր է ուսումնասիրել եղած փորձը: Աշխարհը փոխվում է, կուսակցությունները փոխվում են, նոր մոտեցումներ են ի հայտ գալիս: Այն խիստ բրգաձև կառուցվածքը, որը նախկինում շատ ավելի մեծ տարածում ուներ, այսօր փոփոխություն է կրում: Այդ տեսանկյունից մեզ համ ար հետաքրքիր էր Եվրոպայի փորձը»,-ասաց Մհեր Շահգելդյանը: Պատգամավորը կարևորեց ԵԺԿ-ի մոտեցումները բազմաթիվ ուղղություններով` մարդու իրավունքներ, օրենքի գերակայություն, բայց առանձնացրեց Հայոց ցեղասպանության և Ադրբեջանի ագրեսիայի վերաբերյալ ԵԺԿ-ի դիրքորոշումները:

ՀՅԴ հայ դատի և քաղաքական հարցերի գրասենյակի պատասխանատու Կիրո Մանոյանը, կարևորելով եվրոպական քաղաքական կառույցների հետ համագործակցությունը, նշեց, որ ՀՅԴ-ն այդ տեսանկյունից բավական փորձ ունի: Այն ներկայում անդամակցում է Եվրոպական սոցիալիստական կուսակցությանը:

«Անդամակցության գործընթացն երկար տևեց, կար մոտեցումների թյուրըմբռնում, անհրաժեշտ էր որոշ աշխատանք տանել այդ ուղղությամբ: Անդամակցությունը հնարավորություն է տալիս գործակցելու Եվրոպական սոցիալիստական կուսակցության այլ  կաույցների հետ»,-ասա Կիրո Մանոյանը: Նրա խոսքով, այսօր Եվրոպայում որոշ կուսակցություններ տագնապ են ապրում, սոցիալ-դեմոկրատիան նահանջում է: Ըստ նրա` սա կարող է լինել մի հանգրվան նոր մոտեցումներով հանդես գալու համար:

Եվրոպական քաղաքական կառույցների հետ աշխատելու փորձ ունի նաև «Բարգավաճ Հայաստան» կուսակցությունը:

Կուսակցության անդամ Միքայել Մելքումյանը նշեց, որ  իրենք 2012 թվականից համագործակցում են «Եվրոպայի պահպանողականների և ռեֆորմիստների դաշինք»-ի հետ, սակայն դրան անդամակցել են 2014 թվականին:

«Հայաստանում քաղաքական համակարգի զարգացումն անհրաժեշտություն է: Այդ համատեքստում տեղին է նշել ներկուսակցական դեմոկրատիայի հարցը: Այս համատեքստում շատ կարևոր է եվրոպական քաղաքական կառույցների հետ համագործակցությունը, փորձի փոխանակումը: Մեր գաղափարները պետք է համահունչ լինեն եվրոպական արժեհամակարգի հետ, սակայն պետք է նաև պահպանել մեր ազգային-պետական դիմագիծը»,-հավելեց պատգամավորը:

Եվրոպական քաղաքական կառույցների հետ համագործակցության բավական հարուստ փորձ ունի ՀՀԿ-ն:

 ՀՀԿ անդամ Արտակ Զաքարյանը նշեց, որ եվրոպական քաղաքական կառույցների հետ համագործակցությունը ամենատաբեր հարթակներում զարգանում է:

«Խորհրդարանական մակարդակում լայն համագործակցություն կա Եվրոպական խորհրդարանի ԵԺԿ խմբակցության հետ, և թվով 275 խորհրդարանական պատգամավորների հետ աշխատելու ամենալայն հնարավորությունները կան: Ակտիվ համագործակցություն է տեղի ունենում «Եվրանեսթ» խորհրդարանական վեհաժողովում, Հայաստան- Եվրամիություն խորհրդարանական համագործակցության երկկողմ  ձևաչափում ևս բավական ակտիվ երկխոսություն կա ԵԺԿ մեր գործընեկրների հետ: Սրանք բոլորն այն խողովակներն են, որոնք հնարավորություն են տալիս հայաստանյան կուսակցական քաղաքական համակարգում անընդհատ ունենալ եվրոպական մոտեցումները` ներգրարվելով լավագույն փորձը»,-հավելեց Արտակ Զաքարյանը: