Էմոցիաները շատ էին, բավական դժվարությամբ կտրվեցի իրականությունից ու շատ ուշ կարողացա քնել. Նելլի Խերանյանը դարձավ 50 տարեկան

Aysor.am-ը գրում է.

Գաբրիել Սունդուկյանի անվան ազգային ակադեմիական թատրոնի դերասանուհի, ՀՀ վաստակավոր արտիստուհի Նելլի Խերանյանն այսօր՝ մայսի 10-ին,  դարձավ 50 տարեկան: Aysor.am-ը, շնորհավորելով հոբելյարին, հետաքրքրվեց՝ ինչպե՞ս և ի՞նչ միջավայրում է անցկացնում տոնական օրը:

«Գուցե տարօրինակ թվա, բայց, ընդհանրապես, ես սիրում եմ իմ ծննդյան օրերին թեկուզ կարճ ժամանակով աշխատել: Ունեցել եմ տարեդարձեր, երբ ամբողջ օրս եմ նվիրել աշխատանքին: Այսօր օրս հագեցած կլինի տարբեր բաներով, կլինեմ և թատրոնում՝ ընկերների ու գործընկրների շրջապատում, և տանը՝ ընտանեկան մթնոլորտում: Օրս կլինի տոնական, բայց հանգիստ: Ես ռեստորանային հավաքույթների սիրահար չեմ, որտեղ էմոցիաներն ավելի քիչ, «շիկն ու բլեսկն» ավելի շատ են լինում: Արտիստների կյանքը բուռն է, հավաքներն էլ են բուռն լինում, և դա ես նախընտրում եմ տանը՝ օտար աչքից հեռու»,-մեզ հետ զրույցում նշեց Ն. Խերանյանը: 

Դերասանուհու անակնկալները սկսվել են դեռ կեսգիշերից: «Գիշերը 24:00-ին Տիգրանն ու դստրիկներս իմ օրը տոնի են վերածել. բազում անակնկալներ էին պատրաստել, որոնք ինձ ստիպեցին հուզվել: Էմոցիաները շատ էին, բավական դժվարությամբ կտրվեցի իրականությունից ու շատ ուշ կարողացա քնել»,-մանրամասնեց նա:

Սովորաբար, արտիստների հոբելյանական տարեդարձերը նշվում են մշակութային օջախներում: Օրեր առաջ էլ՝ մայիսի 7-ին, դերասանուհու ամուսինը՝ Գ. Սունդուկյանի անվան ազգային ակադեմիական թատրոնի դերասան, ՀՀ վաստակավոր արտիստ Տիգրան Ներսիսյանը բոլորեց 50-րդ գարունը: Քանի որ ներկա պահին Գ. Սունդուկյանի անվան թատրոնը վերանորոգման մեջ է, դերասան-ամուսինների հոբելյանական երեկոն կհետաձգվի: «Հոբելյանական երեկո սպասվում է թատրոնի վերանորոգումն ավարտելուց հետո, նաև հետաքրքիր ու նոր ներկայացումներ կլինեն: Այնպես որ, ամեն ինչ առջևում է: Ի դեպ, Տիգրանի ծննդյան օրն աղջիկներիս հետ փոքրիկ հոլովակ էինք պատրաստել նրա համար, որի միջոցով իր ընկերները, բարեկամները, սիրելի մարդիկ շնորհավորում էին իրեն: Նա շատ էր հուզվել, արտասվեց ու մեզ շատ-շատ պաչիկներ արեց: Ինքն ու դստրիկներս էլ երեկ ինձ նմանատաիպ անակնկալ մատուցեցին՝ տեսահոլովակի միջոցով փոքրիկ էքսկուրսիա իմ անցյալ… Ընտանիքիցս ինձ համար շատ թանկ ու կարևոր նվերներներ ստացա, որոնք ամբողջ կյանքում ինձ հետ պետք է լինեն, միշտ պետք է կրեմ ինձ վրա՝ որպես այսօրվա հիշողություն»,-հուզմունքով պատմեց դերասանուհին:

Փոխադարձ մաղթանքները մեծամասամբ նույն տեքստն ունեին՝ առողջ լինեն ու միմյանց կողքի, մնացյալ ամեն բան անցողիկ է, դժվարությունները՝ հաղթահարելի: Ուղղակի պետք է կարողանալ միշտ, միմյանց ձեռքից բռնած, թև ու թիկունք լինել:

Կյանքի 50-րդ տասնամյակ թևակոխած արտիստուհին բոլորովին չի սրտնեղում տարիքից: Ընդհակառակը՝ գնահատում է ապրած տարիներն ու ապագան: «Տարիքիդ ավելացման հետ հասկանում ես, որ կյանքը հիասքանչ է: Ամեն օրդ, ամեն պահդ շատ ավելի թանկ է դառնում: Առավել մեծանում է ընտանիքդ պահելու, գուրգուրելու ցանկությունը: Տեսնենք, թե կյանքն ինչ անակնկալներ, գուցե փորձություններ է պատրաստաստել մեզ համար կես դարից հետո: Միշտ ասել եմ ու կկրկնվեմ՝ իմ գլխավոր ձեռքբերումն իմ ընտանիքն է՝ ամուսինս ու աղջիկներս, որոնց փայփայում եմ, որոնց համար ամեն ինչի պատրաստ եմ: Ինձ համար շատ թանկ է նաև հայրական ընտանիքս. Մայրս, ցավոք, մեզ հետ չի, բայց հայրս մեզ հետ է ու ինձ տեսնում է 50 տարեկանում: Անչափ կարոտում ու սիրում եմ նաև եղբորս ընանիքին: Ահա այս մարդիկ են իմ կյանքի ամենամեծ ձեռքբերումները: Իհարկե, չմոռանանք այն աշխատանքի մասին, որին նվիրել եմ ու նվիրելու եմ իմ ողջ կյանքը»,-Aysor.am-ի հետ զրույցը եզրափակեց ՀՀ վաստակավոր արտիստուհի Նելլի Խերանյանը: