Նիցցայի հայերն աջակցում են հայրենիքի պաշտպաններին ու նրանց ընտանիքներին

Ֆրանսիայի Նիցցա քաղաքի հայ համայնքը համախմբվել եւ գումար է հավաքել ապրիլյան պատերազմում նահատակված մի քանի սպաների եւ զինվորների ընտանիքներին դրամական աջակցություն ցուցաբերելու նպատակով:Համայնքի հանգանակությունն անձամբ փոխանցել է ֆրանսահայ Լալա Խալաթյանը:

Խալաթյանը Past.am-ի հետ զրույցում պատմեց, որ Նիցցայի «Հայ մշակութային ակումբ» միության նախաձեռնությամբ կազմակերպվել են եռօրյա պոեզիայի երեկոներ՝ հանգանակություն հավաքելու նպատակով: «Ողջ հայ համայնքը մասնակցել է այս սուրբ գործին առ հայրենիք»,- նշեց Լալա Խալաթյանը:

Նիցցայում ապրող մեր հայրենակիցներն ապրիլյան լարված օրերին ֆրանսիացիների ուշադրությունը հրավիրել են Արցախում տեղի ունեցող դեպքերին: Նրանք մոմավառության երթ են կազմակերպել եւ քայլել դեպի Նիցցայում գտնվող Հայկական պարտեզ՝ Ռուբեն Սեւակի հուշարձանի մոտ: Լալա Խալաթյանը մի քանի օրվա մեջ այցելել է թե՛ Հայաստանում եւ թե՛ Արցախում բնակվող այն ընտանիքներին, որոնց զավակները, հայրերը կամ ամուսինները նահատակվել են Արցախում:

Նիցցայի հայ համայնքի ցանկությունն է եղել առաջնահերթ օգնել բազմանդամ ընտանիքներին, որտեղ երեխաներ են ապրում: Աջակցություն է ցուցաբերվել Թալիշում զոհված, չորս ամսական փոքրիկ ունեցող Ռոբերտ Աբրահամյանի, չորս որդի ունեցող մայոր Սուրեն Մելքումյանի, ազատամարտիկներ Նորայր Հաջյանի եւ Սարգիս Խալաֆյանի ընտանիքներին եւ այլն: Նիցցայի հայ համայնքը նաեւ զինվորական ժամանակակից ժգուտներ է հանձնել Ստեփանակերտի հոսպիտալին: Լալա Խալաթյանի խոսքով՝ այս օժանդակությունը մի մեծ բան չէ, քանի որ ամեն հայի պարտքն է լինել զինվորականների եւ նրանց ընտանիքների կողքին:

Լուսանկարում՝ Լալա Խալաթյանն է:

Քրիստինա Տեր-Մաթեւոսյան