Խարազյանցիները տասնօրյա ներկայացումների հասույթը փոխանցեցին Արցախին

Արտաշատի Ամո Խարազյանի անվան պետական դրամատիկական թատրոնի տնօրինությունը, Ցեղասպանության 101-րդ տարելիցի կապակցությամբ, ապրիլին հայտարարված թատերական տասնօրյակի շրջանակում տոմսերի վաճառքից հավաքագրված  500 հազար դրամը փոխանցեց Արցախին:

 «Արմենպրես»-ի թղթակցի հետ զրույցում թատրոնի տնօրեն Գեղանուշ Սայադյանն ընդգծեց, որ մեր երկրի եւ ժողովրդի համար այս դժվարին ժամանակաշրջանում խարազյանցիները նույնպես սատար կանգնեցին եւ մասնակից եղան Արցախում ավերված բնակավայրերի վերականգնման եւ առավել բարեկարգման գործին: «Չորսօրյա պատերազմը բոլորիս համախմբեց, եւ մենք համոզվեցինք, որ առավել քան միասնական ենք: Յուրաքանչյուր հայ իր հոգու պարտքը համարեց ինչով կարող է օգտակար լինել մեր հայրենիքի մի մասնիկին աջակցելու գործին ձեռք մեկնելուն: Այդ գաղափարով էլ առաջնորդվելով՝ հայտարարեցինք թատերական տասնօրյակը»,-նշեց Սայադյանը, ավելացնելով, որ որպես հայ մայր, որպես կին հպարտ է մեր տղաների կատարած սխրանքներով, եւ համոզված, որ թատրոնի կողմից տրամադրվելիք այս ներդրումը կծառայի իր նպատակին` օգտակար լինելով բանակին:

Խոսելով դերասանների ոգեւորվածության մասին՝ նա ընդգծեց. «Մեր թատրոնի դերասանական կազմը միշտ է փայլուն հադես եկել, բայց այս անգամ ոգեւորությունը կարծես այլ երանգ էր ստացել: Նրանք  իրենց դերակատարությանն ասես վերաբերում էին ինչպես մի առաքելության ու հոգու պարտքի՝ հասկանալով, որ իրենց խաղով նպաստում են Արցախի պաշտպանության ու վերականգնման գործին»:

Այս ընթացքում թատրոնի տնօրինության եւ դերասնական անձնակազմի կողմից տեղի են ունեցել նաեւ անհատական գումարների հավաքագրումներ: Հավաքված գումարը տրամադրվել է Արցախում զոհված արտաշատցի զինվոր Կարեն Գրիգորյանի ընտանիքին: 

Տասնօրյակի ընթացքում դերասանական կազմը հանդես եկավ յոթ ներկայացմամբ` հանդիսատեսի դատին կրկին հանձնելով Ցեղասպանության 100-ամյակին նվիրված երկու բեմադրությունները` Մարկ Արենի «Վայրի վարդերը» եւ Պարույր Սեւակի «Ողբամ մեռելոց, կոչեմ ապրողաց»-ը: 

Մոսկվաբնակ տաղանդավոր գրող Մարկ Արենի /Կարեն Մարգարյան/ «Այնտեղ, որտեղ ծաղկում են վայրի վարդերը» պիեսի հիման վրա ստեղծվածմեկժամանոց բեմադրության մեջ ընդգրկված են թատրոնի դերասանական անձնակազմի 20 արտիստներ եւ հինգ երեխա: Հեղինակն անդրադարձելէ ցեղասպանության հետեւանքներին, որ կրում են ոչ միայն վերապրածները, այլեւ նոր սերունդը: Նույնիսկ սիրող զույգերը ստիպված են հաշվինստել իրենց նախնիների կատարած ոճիրի հետ: Գլխավոր հերոս Դանիելը հրաժարվում է սիրած աղջկանից, որովհետեւ նա թրքուհի է:Ողբերգություն է ապրում նաեւ Արամի ընտանքը, երբ  պարզվում է, որ իրենց հայրը հայ է: Ներկայացումը նոր սերնդին հորդորում է չմոռանալիր արմատները:

Երկրորդ բեմադրությունը սեւակյան թեմայով գրական-երաժշտական 40 րոպեանոց կոմպոզիցիա է` ստեղծված «Եռաձայն պատարագ» եւ«Անլռելի զանգակատուն» ստեղծագործությունների հիման վրա: Այստեղ ընդգրկված են վեց դերասան:

Բեմադրությունների գեղարվեստական ղեկավարն է ՀՀ արվեստի վաստակավոր գործիչ Հայկ Մնացականյանը: 

Լիլիթ Մաճկալյան