14,6 մլն եվրո Գյումրու քաղաքային ճանապարհներին
ԲԼՈԳՆարեկ Սարգսյանը ֆեյսբուքյան իր էջում գրում է.
Հայաստանի Հանրապետության և Վերակառուցման և զարգացման եվրոպական բանկի միջև ս.թ. մայիսի 11-ին ստորագրվել է «Գյումրու քաղաքային ճանապարհների ծրագիր» վարկային համաձայնագիրը, որով նախատեսվում է Հայաստանին տրամադրել 14,6 մլն եվրո գումարի չափով վարկ` Գյումրու քաղաքային ճանապարհների ծրագրի իրականացման համար:
Ծրագրի նպատակն է Գյումրի քաղաքում ունենալ անվտանգ երթևեկության կազմակերպման համար բարեկարգ փողոցներ և էներգախնայողական արտաքին լուսավորության ցանց: Մասնավորապես նախատեսվում է հիմնանորոգել քաղաքի ճանապարհները, արդիականացնել փողոցների արտաքին լուսավորության ցանցը և վերակառուցել լուսավորության ենթակառուցվածքները, նորոգել ասֆալտի ծածկը և մայթերը, կառուցել հետիոտնային նոր տարածքներ, մշակել քաղաքի ավտոկայանատեղիների տեղաբաշխման ռազմավարությունը:
Վարկը տրամադրվում է 15 տարով, որից արտոնյալ ժամկետը 3 տարի է: Այժմ համաձայնագիրը ներպետական ընթացակարգի անցման փուլում է, և համաձայն ՀՀ վարչապետի 2014թ. հոկտեմբերի 7-ի հանձնարարության` իբրև միջպետական միջազգային փաստաթուղթ պետք է ներկայացվի կառավարության հաստատմանը: Համաձայնագիրը գործադրի ս.թ. մայիսի 19-ի նիստում կառավարությանը կներկայացնի ՀՀ տարածքային կառավարման և զարգացման նախարարությունը, որը նպատակահարմար է համարում արձանագրային որոշման ընդունումը: