Գարիկ Մարտիրոսյանը՝ Գեղարքունիքի շախմատի մարզային առաջնության հաղթող

Գավառ քաղաքի շախմատի տանը տեղի ունեցավ Գեղարքունիքի շախմատի  մարզային առաջնություն, որը նվիրված էր մայիսյան հաղթանակներին:

Ինչպես «Արմենպրես»-ին տեղեկացրին Գեղարքունիքի մարզպետարանից, մարզային առաջնությունն անցկացվեց ՖԻԴԵ-ի կանոնակարգի համաձայն, երկու փուլով՝ տարածքային եւ մարզային: Տարածքային փուլին մասնակցեցին շուրջ 200 շախմատիստներ, մրցումներն անցկացվեցին մայիսի 3-7-ը`  Հայաստանի շախմատի ակադեմիայի Գավառի, Մարտունու, Վարդենիկի, Վարդենիսի, Ճամբարակի, Սեւանի եւ Սարուխանի մասնաճյուղերում: Տարածքային փուլի մրցումներում 1-ին, 2-րդ եւ 3–րդ տեղերը գրաված շախմատիստները մասնակցեցին մարզային փուլի մրցումներին: Առաջնությունում առաջին տեղը գրավեց Ճամբարակ քաղաքի ներկայացուցիչ Գարիկ Մարտիրոսյանը, երկրորդ հորիզոնականում էր Վերին Գետաշեն համայնքի ներկայացուցիչ  Կոմիտաս Սիմոնյանը, իսկ երրորդ հորիզոնականում` Սեւան քաղաքի ներկայացուցիչ  Արմեն Վարդանյանը: Մարզային առաջնությունում առաջին եւ երկրորդ տեղեր գրաված շախմատիստները իրավունք ստացան մասնակցելու մայիսի 23-ից հունիսի 3-ը Ջերմուկ քաղաքում կայանալիք Հայաստանի տղամարդկանց շախմատի 2016 թվականի առաջնության կիսաեզրափակիչ մրցաշարին:

Խոսրով Խլղաթյան