Ջերմուկ քաղաքում մեկնարկում է զբոսաշրջային ակտիվ շրջանը

ՀԱՍԱՐԱԿՈՒԹՅՈՒՆ 19 Մայիս, 2016 14:37

Տարեցտարի գեղեցկացող առողջարանային Ջերմուկ քաղաքում մեկնարկում է զբոսաշրջային ակտիվ շրջանը: Հյուրանոցային համալիրների սեփականատերերը եւ աշխատակիցները ջանք ու եռանդ չեն խնայում զբոսաշրջիկներին դիմավորելու և բարձակարգ հանգիստ ապահովելու համար:

Հյուրանոցների, սրճարանների եւ ժամանացի այլ տարածքներում շարունակվում են բարեկարգման աշխատանքները, կատարվում են կանաչապատման և մաքրման աշխատանքները:

«Ջերմուկը Հայաստանի ամենապահանջված հանգստավայրերից է եւ սիրված է քաղաք այցելող հյուրերի կողմից: Ջերմուկում առողջարանները և հյուրատները տարեցտարի ավելանում են ու բարելավող մատուցվող ծառայությունների որակը, ինչի շնորհիվ էլ հանգիստը Ջերմուկում պահանջված է ոչ միայն հայաստանցիների, այլ նաև օտարերկրյա զբոսաշրջիկների շրջանում»: Այս մասին Past.am-ի հետ զրույցում նշում են առողջարանների տնօրենները եւ ավելացնում, որ այս տարի եւս ջանք ու եռանդ չեն խնայելու, որպեսզի զբոսաշրջիկների հանգիստը էլ ավելի օգտակար եւ հագեցված կազմակերպվի:

Օտարերկրացիների կողմից առանձնահատուկ պահանջարկ են վայելում մի շարք առողջարաններ: Մյուս առողջարանները կամ հյուրանոցները նույնպես մեծ ճանաչում եւ մեծ պահանջարկ ունեն: Հյուրընկալության համար նախատեսված հաստատություններից Ջերմուկում կան ինչպես առողջարաններ եւ հանգստյան տներ, այնպես էլ հյուրանոցներ ու հյուրատներ, որոնք բուժական հատուկ ծառայություններ չեն մատուցում և առավել մատչելի են:

«Մենք եկել ենք Ֆրանսիայից, արդեն երեք օր է այստեղ ենք: Հանգստանում ենք Ջերմուկի առողջարաններից մեկում: Շատ գոհ ենք թե՛ բուժանձնակազմից, թե՛ տնօրինությունից: Մենք գրեթե ամեն տարի այցելում ենք Ջերմուկ և մեր հանգիստն ենք վայելում մեր երկրում՝ Հայաստանում: Եթե համեմատություն անցկացնենք այլ երկրների առողջարաններում մատուցվող ծառայությունների հետ, ապա Ջերմուկում գները ավելի մատչելի են»:

Past.am-ի թղթակցի այն հարցին, թե Ջերմուկում ի՞նչն է իրենց գրավել, զբոսաշրջիկները պատասխանեցին.

«Մեզ շատ դուր եկավ Ջերմուկի ջրվեժը և ճոպանուղին: Ինչպես մեզ տեղեկացրեցին ճոպանուղու աշխատակիցները, ճոպանուղին նոր է: Իսկապես շատ հաճելի է երբ բարձրանում ես ծովի մակերևույթից 2400 մետր և բարձրությունից վայելում գեղեցիկ ու տեսարժան Ջերմուկը»:

Նարեկ Միրզոյան / Past.am