Գավառի ավագ դպրոցն իր զորակցությունն է ցուցաբերել վիրավոր զինծառայող Նորայր Զախարյանին

Գավառի ավագ դպրոցի աշակերտների, ուսուցիչների եւ ծնողների միասնական ցանկությամբ հանգանակած գումարն անձամբ հանձնվեց այս տարվա ապրիլյան հերոսամարտերի ժամանակ Թալիշում վիրավորված ժամկետային զինծառայող, գավառցի Նորայր Զախարյանին: Նորայր Զախարյանը ոտքից վիրավորվել էր Թալիշում՝ ականապատում իրականացնելիս: Մուրացանի զինվ որական հոսպիտալում երկարատեւ բուժում ստանալուց հետո Նորայրն արդեն դուրս է գրվել եւ այժմ հայրենի Գավառ քաղաքում է:

«Արմենպրես»-ի տեղեկացմամբ՝ Նորայրենց տուն այցելել էին Գավառի ավագ դպրոցի աշակերտները եւ ուսուցիչները: Հանդիպումն անցավ մտերմիկ մթնոլորտում, Նորայրն ապագա զինվորների հետ կիսվեց իր ռազմական գիտելիքներով, անցած զինվորական հուշերով: Նա ասաց, որ անդամահատված ոտքն իրեն չի խանգարի, բուժումներն ավարտելուց հետո ինքը կրկին բանակ է գնալու, նույնիսկ մտադիր է զինվորական դառնալ:

Դրամական օգնության հետ Նորայրին հանձնվեց նաեւ դպրոցի կողմից նկարազարդված նամակ, որտեղ տեղ էին գտել երախտիքի, խոնարհումի եւ հպարտության խոսքեր՝ հասցեագրված  համաքաղաքացի զինվորին:

«Հայրենիքի պաշտպանին նյութական ու բարոյական աջակցություն ցույց տալը պետք է լինի բոլորիս պարտքը: Նրանք պետք է իրենց մենակ կամ տխուր չզգան, այլ պետք է ոգեւորվեն այն մտքից, որ գնահատված ու սիրված են բոլորիս կողմից»- «Արմենպրես»-ի հետ զրույցում նշեց դպրոցի տնօրենի տեղակալ Ալիտա Բաբասյանը:

Խոսրով Խլղաթյան