Մոսկվայում կանցկացվի հայկական նորաձեւության երեկո՝ Armfashionday-2016-ը

Մայիսի 28-ին Մոսկվայի Golden Palace համալիրում երկրորդ անգամ կկայանա Arm fashionday-2016-ը՝ հայկական նորաձեւության հայտնի հայազգի մոդելավորող-դիզայներների աշխատանքների գարնանային ցուցադրությունը:

Այս տարի ցուցադրությանը կմասնակցի ութ հայազգի հագուստի եւ աքսեսուարների դիզայներ, այդ թվում` Արամ Նիկոլյանն իր «Ուրֆա» հավաքածուով, «Տերյան» մշակութային կենտրոնի ղեկավար Լիլիթ Մելիքյանը, ով կներկայացնի իր նոր` «Կարպետ» եւ «Խաչքար» հավաքածուները: El’ka հարսանյաց սրահի հիմնադիր Հասմիկ Աբրահամյանը կներկայացնի հարսանյաց զգեստների իր նոր հավաքածուն: Կլինեն նաեւ մոսկովյան մասնակիցներ` հագուստի մոդելավորող Անի Մանուկյանը, ով ներկայացնելու է երեկոյան զգեստների նոր հավաքածուն եւ պարուհի Վարդանուշ Մարտիրոսյանը` իր Varda TM լողազգեստենրի հավաքածուով:

«Միջոցառման նպատակը հասարակության լայն շրջանակներին տաղանդավոր հայ մոդելավորող-դիզայներների օրիգինալ զգեստները մեկ հարթակում ներկայացնելն է»,- հայտնել է միջոցառման համակարգող Նաիրա Նիազյանը:

Վերջինս նշել է, որ շոուի շրջանակներում կանցկացվի մրցույթ, որին կմասնակի երեք սկսնակ մոդելավորող` Մարգարիտ Նանուշյանը, Տիգրան Վահանյանը եւ Ռոզա Մինասյանը: Նրանց հնարավորություն կտրվի ներկայանալ եւ մասնակցել նման խոշոր միջոցառման` արդեն կայացած դիզայներներ-մոդելավորողների հետ հավասար:

Մրցույթի հաղթողին հնարավորություն կտրվի երկու ամսվա ընթացքում վաճառքի հանել իր հավաքածուն մոսկովյան մուլտիբրենդերից մեկում: Սկսնակների աշխատանքները գնահատելու է փորձագիտական ժյուրին, որի կազմում են դիզայներ Արմեն Երիցյանը, մոսկվաբնակ կոշիկի դիզայներ Տիգրան Ալբերտին եւ ոճաբան Եսայի Սիմիկյանը:

Armfashionday-ը հասցրել է խոշոր եւ երկար սպասված իրադարձության համբավ ձեռք բերել Ռուսաստանի եւ Հայաստանի նորաձեւության ոլորտում: Միջոցառման հյուրերի թվում ներկա կլինեն VIP-անձինք, մեդիայի, բիզնեսի ու շոու բիզնեսի, ինչպես նաեւ լրատվամիջոցների ներկայացուցիչներ:

Նախատեսված է, որ միջոցառմանը կմասնակցի մոտ 2000 մարդ: VIP-հյուրերից իրենց ներկայությունն արդեն հաստատել են Անաստասիա Վոլոչկովան, ով հյուրախաղերով հանդես է եկել Երեւանում, մոդելավորող Յանա Շեւչենկոն, իտալացի օպերային եւ փոփ-երգչուհի Աննա Ազերլին, նորաձեւ հագուստի դիզայներ Յուլյա Դալաքյանը, հագուստի եւ աքսեսուարների դիզայներ Սվետլանա Եվստիգնեեւան, դերասանուհի եւ երգչուհի Աննա Կալաշնիկովան, երգիչ Յուրի Տիտովը եւ այլք:

Քրիստինա Տեր-Մաթեւոսյան