Երգչուհի Անահիտ Շահբազյանը այս օրերին կարեւոր աշխատանքներով է զբաղված. նա պատրաստվում է նկարահանել իր նոր տեսահոլովակը, որի ռեժիսորությամբ զբաղվելու է սիրելին՝ երաժիշ Կարեն Զադիրյանը, ում հետ երգչուհին նշանադրվել է փետրվարի 14-ին՝ Սուրբ Վալենտինի օրը:
«Դեռեւս ամիսներ առաջ խոստացել էի տեսահոլովակ նկարահանել իմ՝ «Արեւ» երգի հիման վրա, որի հեղինակն է տաղանդավոր երաժիշտ Արսեն Գրիգորյանը: Այս տեսահոլովակիս նկարահանումները անընդհատ ձգձգվում էին, բայց գլխավորը լավ արդյունք ունենալն է, եւ հուսամ այդպես էլ կլինի: Նկրահանումները կսկսվեն հաջորդ շաբաթ, ի դեպ՝ ռեժիսորությամբ զբաղվելու է սիրելիս»,- Life.panorama.am-ի հետ զրույցում հայտնեց երգչուհին ու շարունակեց.
«Ես մինիմալիզմի սիրահար եմ ու այդ առումով իմ ու սիրելիիս կարծիքները համընկնում են՝ մենք ճոխություններ չենք սիրում: Հենց մինիմալիստական լուծումներով էլ կլինի նոր տեսահոլովակս, կլինեն գույներ, արեւային տրամադրություն ու բնության պես պարզ լուծումներ: Վստահ եմ, որ սիրելիս եւ օպերատոր Արթուր Ամիրաքյանը գեղեցիկ աշխատանք կստեղծեն: Անկեղծ ասած, ընդամենը մի քանի օր է մնացել նկարահանումների մեկնարկին, բայց իմ եւ Կարենի զբաղվածության պատճառով դեռեւս չենք հասցրել քննարկել մանրամասները, այդ իսկ պաճառով շատ բաներ ինձ համար էլ են դեռեւս անհայտ»:
Տեսահոլովակում Անահիտ Շահբազյանի ոճով կզբաղվի ոճաբան Արամ Նիկոլյանը.
«Ես ու սիրելիս որոշեցիք համագործակցել Արամ Նիկոլյանի հետ, քանի որ երկուսիս էլ շատ է դուր գալիս նրա աշխատանքները: Մեկ կերպարով հանդես կգամ, քանի որ այս պարագայում էլ չենք ցանկանում ծանրացնել տեսահոլովակը: Առհասարակ, ես շատ «խտացված» տեսահոլովակներ չեմ սիրում, եւ կարծում եմ, որ մեր օրերի պահանջարկում էլ չկան նման գործեր: Իհարկե, կարելի է երբեմն-երբեմն ճոխ տեսահոլովակներ ստեղծել, բայց ըստ իս՝ դա ավելի շատ համապատասխան է արտերկրի շոու բիզնեսին: Եթե ունես լավ երգ, կարելի է ուղղակի դրան կյանք տալու համար ստեղծել շատ պարզ տեսահոլովակ, այն գուցե շատ ավելի սիրվի, քան որեւէ այլ ճոխ նկարահանումներով հոլովակը»,- նշեց Անահիտ Շահբազյանը:
Անահիտի համար սիրելիի հետ աշխատելը դժվար չէ, նույնիսկ ընդհակառակը.
«Շատ հաճելի է աշխատել սիրելիիս հետ. որպես գործընկերներ էլ մեր միջեւ աշխատանքային իմաստով ոչ մի բարդություն չի լինում, քանի որ մենք առաջին հերթին լավ ընկերներ ենք, իրար շատ ենք հասկանում ու գնահատում: Կարենից չունեմ գաղտնիքներ, չունեմ մի բան, որից կամաչեմ նրա առաջ կամ կթաքցնեմ նրանից: Այդ իսկ պատճառո ինձ համար ավելի հեշտ է աշխատել հենց սիրելիիս հետ, քան օտար մարդու: Իմ բախտը բերել է երկկողմանի՝ ես ունեմ եւ լավ սիրելի, եւ լավ գործընկեր »,- պատմեց երգչուհին:
