ԱՄՆ-ն կարող են պատժամիջոցներ կիրառել Ադրբեջանի իշխանությունների դեմ. Ջոն Մակքեյն

Ամերիկացի ազդեցիկ սենատոր, հանրապետական Ջոն Մակքեյնը պաշտոնական Բաքվին կոչ է արել անհապաղ բանտից ազատ արձակել «Ազատություն» ռադիոկայանի հետազոտող-լրագրող Խադիջա Իսմայիլովային` սպառնալով, հակառակ դեպքում, Ադրբեջանի իշխանությունների դեմ պատժամիջոցներ կիրառել:

Այս մասին ամերիկացի սենատորը հայտարարել է «Ազատություն» ռադիոկայանի ադրբեջանական ծառայության թղթակցին տված հարցազրույցում:

Պատասխանելով այն հարցին, թե անձամբ իր համար ինչ է նշանակում լրագրող Խադիջա իսմայիլովայի կողմից Ադրբեջանի նախագահ Իլհամ Ալիեւի ընտանիքի կոռուպցիոն բիզնեսի բացահայտումը եւ այդ պատճառով նրա բանտարկությունը, սենատորն ասել է, որ Խադիջայի ձերբակալությունը դուրս է գալիս մեկ անձի շրջանակից եւ ընդգրկում հարցերի շատ ավելի լայն շրջանակ:

«Խոսքը խիզախ եւ անվեհեր կնոջ կողմից կոռուպցիայի բացահայտման մասին է: Ձերբակալելով Խադիջային, ադրբեջանական կառավարությունը պայքարում է ժողովրդավարության եւ մամուլի ազատության դեմ, դրանով ցույց տալով բոլորին, որ ինչ է լինում նման գործունեության դեպքում: Այսպիսով, դա ոչ միայն Խադիջայի պատմությունն է, այլ բարեփոխումների անհրաժեշտության վկայությունը», -նշել է սենատորը:

Ջոն Մակքեյնը հիշեցրել է, որ ԱՄՆ-ի Կոնգրեսում ընթանում է աշխարհում մարդու իրավունքները խախտող պետական պաշտոնատար անձանց դեմ ուղղված «Գլոբալ Մագնիտսկի» օրինագիծը եւ ինքն այն անձանցից է, որոնք պաշտպանում են այդ փաստաթուղթը:

«Եթե իշխանությունները շարունակեն խախտել մարդու իրավունքները, ապա անհրաժեշտ է միջոցներ ձեռնարկել Ադրբեջանի կառավարության դեմ: Մագնիտսկու օրենքը վախեցրել է ամբողջ աշխարհում դիկտատորներին: Ադրբեջանի կառավարությունն արհամարհում է միջազգային նորմերը, շարունակում է անմեղ մարդկանց ձերբակալությունները` խախտելով նրանց իրավունքները եւ մամուլի ազատությունը: Այդ գործընթացների շարունակումը մեզ հարկադրում է որոշակի քայլեր ձեռնարկել», -ամփոփել է Ջոն Մակքեյնը:

The Washington Post թերթի` Ներկայացուցիչների պալատին մայիսի սկզբին հղած` «Եթե Սպիտակ տունը գերակա հայտարարեր Խադիջա Իսմայիլովային, նա ազատության մեջ կլիներ» վերնագրով նամակ-կոչում նշվել էր, որ եթե ԱՄՆ-ի Ներկայացուցիչների պալատն ընդունի Մագնիտսկու ակտի նման նախագիծ եւ տարածի Ադրբեջանի վրա, ապա կառավարության պաշտոնյաների ապօրինի գործունեությունը բացահայտած մարդու իրավունքների ակտիվիստները, այդ թվում` Ադրբեջանի իշխող ընտանիքի կռուպցիոն գործողությունները բացահայտած Խադիջա Իսմայիլովան վաղուց ազատ արձակված կլինեին ադրբեջանական բանտերից:

«Խադիջա Իսմայիլովան Ադրբեջանի առաջնորդ Իլհամ Ալիեւի եւ նրա ընտանիքի կոռուպցիոն գործունեությունները բացահայտող աղմկալից հետազոտություններ է պատրաստել, ինչը օրերս հաստատել է նաեւ Panama Papers-ը` օֆշորի հետ կապված հրապարակման մեջ», -գրել է թերթն` ընդգծելով, որ ԱՄՆ-ի բարձրաստիճան պաշտոնյաներն անտեսում են որոշ ռեժիմների կողմից մարդու իրավունքների կոպտորեն ոտնահարումները` բավարար համարելով այն, որ միայն թե դրանք համապատասխանեն ԱՄՆ-ի մյուս շահերին:

«Եթե Ներկայացուցիչների պալատն ընդունի խոսքի իրավունքի խախտումների համար նաեւ Ադրբեջանի դեմ պատժամիջոցներ նախատեսող` Գլոբալ Մագնիտսկու Ակտի նախագիծը, ապա այն կիրառության մեջ կմտներ եւ ազդեցություն կունենար Խադիջա Իսմայիլովայի գործի նման հարցերի վրա», -գրում է թերթը:

Թերթը նշում է, որ Գլոբալ Մագնիտսկու Ակտը պատրաստել է սենատոր Բենջամին Կարդինը: Այն սենատով անցել է դեկտեմբերին եւ այժմ գտնվում է Ներկայացուցիչների պալատում:

Թերթը գրում է, որ վարչակազմի որոշ անդամների կարծիքով, այդ օրինագիծը մարդու իրավունքների հետ կապված գործերով սահմանափակում է ԱՄՆ-ի գործողությունները, այն կարող է տարածվել նաեւ մարդու իրավունքների արշավների կազմակերպիչների, տեղեկատվություն փոխանցողների վրա: Այդուհանդերձ` The Washington Post-ը Ներկայացուցիչների պալատին կոչ է անում անհապաղ ընդունել այդ օրենքը` Ադրբեջանի դեմ պատժամիջոցներն արագացնելու համար:

«Գլոբալ Մագնիտսկու Ակտ» օրենքը պատժամիջոցներ է նախատեսում ամբողջ աշխարհում կոռուպցիոներների եւ մարդու իրավունքների խախտողների դեմ, ինչպես նաեւ նրանց սեփականության ձրբակալությունն ԱՄՆ-ում: Օրինագծով վիզային պատժամիջոցներ է նախատեսվում կիրառել մարդու իրավունքների խախտումներին մասնակից Ադրբեջանի կառավարության ղեկավարության ներկայացուցիչների նկատմամբ: