ՀՀ նախագահը՝ Դարբինյանների գժտության պատճառ

Վանաձորի քաղաքապետ Սամվել Դարբինյանի և նրա ազգականի՝ քաղաքապետարանի նախկին բաժնի պետ Վիկտոր Դարբինյանի, հարաբերությունների սրումն ու գժտությունը միառժամանակ հանրության ուշադրության ու խոսակցությունների առարկան էր: Քաղաքապետի ազգականը հրապարակավ ներկայացրեց իր կողմից տարիներով սպասարկվող քաղաքի թիվ մեկ երթուղին քաղաքապետի որդու սանիկի ընկերությանն անցնելու հանգամանքները՝ ապացույցներով, այդ թվում նախորդած՝ դրա վերաբերյալ քաղաքապետի բանագնացների հետ խոսակցությունների ձայնագրություններ:

Բայց երթուղին Վիկտոր Դարբինյանից վերցնելուց հետո էլ սկսեցին քայլեր ձեռնարկվել նրա կողմից շահագործվող վճարովի ավտոկայանատեղի սպասարկումը դադարեցնելու ուղղությամբ՝ վարձակալությունից ինքնակամ հրաժարվելու նրան ուղղված գրությունից մինչև դատարան նրա դեմ ներկայացված հայցադիմումով:

Վիկտոր Դարբինյանը բացահայտումներ արեց քաղաքապետի և նրա յուրայինների կողմից իր նկատմամբ հետապնդումների մասին, ոստիկանությունում նրա տված հաղորդումների հիման վրա քրեական գործեր հարուցվեցին քաղաքապետարանի աշխատակազմի կողմից պաշտոնական լիազորությունների չարաշահման և պաշտոնական կեղծիքի հիմքով: 7-րդ ամիսն է՝ նախաքննությունը չի ավարտվում:

Քրգործի շրջանակում մարտի 12-ին քննիչի նախաձեռնությամբ Lոռու մարզի քննչական բաժնում երկու Դարբինյանների միջև առերես հարցաքննության ժամանակ, ինչպես պարզվում է, երևան են եկել նոր հանգամանքներ: Քաղաքապետի ազգականի փոխանցմամբ՝ քաղաքապետը ցուցմունքով հաստատել է երթուղուց բացի վճարովի ավտոկայանատեղին նույնպես ազգականից վերցնելու մտադրության մասին և վերջինիս ունեզրկման պատճառ է նշել՝ շահարկելով հանրապետության գործող նախագահի անունը: Ասել է, թե քանի որ ազգականը վերջին նախագահական ընտրություններում գործող նախագահին չի ընտրել, իրենք այդ պատճառով հաշվեհարդար են տեսնում նրա հետ: Այսինքն, ստացվում է, քաղաքապետը փաստացի ընդունել է, որ միտումնավոր հետապնդում է իրականացնում ազգականի նկատմամբ՝ չարաշահելով իր պաշտոնական լիազորությունները:

«Իրենք այդ անհեթեթ պառճառն են բերում՝ որպես արդարացում իրենց գործողություններին և ինձ ունեզրկման գործընթացը իրականացնելու համար»,- ասում է Վիկտոր Դարբինյանը:

Քանի որ կանխամտածված, թե անզգուշորեն, քաղաքապետն այդ թեման արծարծել է, Վիկտոր Դարբինյանն էլ պահանջել է, որ քաղաքապետն ամբողջությամբ ներկայացնի եղելությունը՝ չանտեսելով նաև իր հարազատ եղբոր խոսքերը: Վերջինիս անունը լսելուն պես քաղաքապետը վրդովվել է և, քննիչի ներկայությունից բնավ չկաշկանդվելով, սկսել է սպառնալիքներ տեղալ ազգականի հասցեին, ապա թողել-հեռացել է՝ հարցաքննությունը չավարտված: Իսկ Վիկտոր Դարբինյանը լրացուցիչ հարցաքննվել է նոր երևան եկած հանգամանքի շուրջ և ցուցմունք տվել նախագահին ընտրել-չընտրելու և դրա պատճառով իր նկատմամբ հաշվեհարդար տեսնելու՝ քաղաքապետի հայտարարության վերաբերյալ:

Վիկտոր Դարբինյանը քաղաքապետի ընտանիքին վերաբերող այդ դրվագը ներկայացնում է ամբողջական. «Ճաշի սեղանի շուրջը մեր զրույցի ժամանակ, երևի զրույցն էլ կատակով էր ընթանում, քաղաքական թեմայով զրուցելու ժամանակ քաղաքապետի եղբայրը սկսեց դժգոհություններ արտահայտել, նույնիսկ սեռական բնույթի հայհոյանքներ՝ գործող նախագահի մասով՝ ասելով, որ երկիրը էս վիճակի հասցրեց, չեմ ցանկացել, որ դա շոշափվի, ասել եմ՝ ինչ պատահեց, դու չէի՞ր, որ ընտրությունների ժամանակ ակտիվ քարոզարշավով էիր զբաղված, ասաց՝ դու էլ ես դա արել, ասեցի՝ չեմ հրաժարվում, ուղղակի էս վերջին ընտրություններին քեզանից շուտ եմ խելքի եկել, կատակով զրուցելով էսպես ասեցի՝ վերջին ընտրություններին նրան չեմ ընտրել: Եվ հենց դա պատճառ բռնելով՝ սկսեցին ինձ հետապնդել, որ պետք է ունեցվածքդ մեզ տաս: Դրանից հետո սկսվեց ամբողջ արշավը»,- պատմում է Վիկտոր Դարբինյանը:

Ի դեպ, քաղաքապետի տված ֆիզիկական սպառնալիքների հիմքով, դրանք իրատեսական գտնելով, Վիկտոր Դարբինյանը դիմել է քննիչին՝ ապահովելու իր և ընտանիքի անվտանգությունը, որի վերաբերյալ կայացվել է որոշում:

Ադրինե Թորոսյան