Ձմռան համար ելակի մթերման թոփ 6 տարբերակ

1. Ելակի մուրաբա

Բաղադրիչները՝

• 1կգ ելակ
• 1 կգ շաքարավազ

Պատրաստման եղանակը`

Ելակը մաքրեք, լվացեք ու վրան լցրեք շաքարավազ: Զգուշությամբ այն պարբերաբար խառնեք: Այդ ընթացքում շաքարավաձը լուծվում է ու հատապտուղները ներծծում են այդ օշարակը:
Հատապտուղներով կաթսան դրեք կրակի վրա , հասցրեք եռման ջերմաստիճանի ու եփեք միայն 5 րոպե: Այնուհետև թողեք հատապտուղները սառչեն: Նման կերպ շարունակեք եփել  3 անգամ: Վերջին անգամ եփելուց հետո թողեք մուրաբան սառչի 15 րոպե, որից հետո այն լցրեք մաքուր, ցանկալի է տաք բանկանների մեջ:

2. Սառեցված ելակ

Բաղադրիչները՝
• 1 կգ հատապտուղ
• Շաքարավազ ըստ ցանկության

Պատրաստման եղանակը՝

Ելակը լվացեք, առանձնացրեք  պոչերը, հարիչով պատրաստեք ելակի խյուս, ավելացրեք շաքարավազ ու նորից հարեք այնքան, մինչև որ ստացվի համասեռ զանգված:
Լցրեք այդ խյուսը փոքր ամանների մեջ և դրեք սառցախցիկում որպեսզի սառչի:

Ձմռանը շատ հարմարավետ է նման տեսքով պատրաստված ելակի օգտագործումը, քանի որ նրանում առկա շաքարավազը կանխում է ելակի  չափից շատ սառչելն ու հատապտուղը մնում է բավականին փափուկ:Սառցախցիկից հանելուց անմիջապես հետո այն կարող եք օգտագրծել:
Նման կերպ կարող եք սառեցնել ցանկացած տեսակի հատապտուղ ու միրգ: Շաքարավազ կարող եք առհասարակ չավելացնել, կամ ավելացնել շատ քիչ:

3. Ելակի կոմպոտ

Ելակի կոմպոտը բավականին հեշտ է պատրաստվում և ձմռանը պահպանում է իր հաճելի գույնն ու բույրը:

Բաղադրիչները՝

• հատապտուղ
• շաքարավազ՝ 1 բաժակ շաքարավազը 1 լիտր ջրի  համար
• ջուր

Պատրաստման եղանակը

Մաքրեք ու լվացեք հատապտուղները, հեռացրեք վնասված ելակները: Մաքուր հատապտուղները լցրեք լվացած, ստերիլիզացված  բանկաների մեջ: Ելակը լցրեք բանկայի ¼ չափով կամ մի փոքր ավելի շատ:

Պատրաստեք շաքարավազով օշարակ: Կաթսայի մեջ լցրեք ջուր, հասցրեք այն եռման ջերմաստիճանի, ապա ավելացրեք շաքարավազը: Խառնեք  այնքան, մինչև որ շաքարավազը հալչի ու օշարակը սկսի եռալ:

Երեք լիտրանոց բանկայի մեջ լցրեք մի քիչ օշարակ, որպեսզի այն չպայթի, պտտեք այն որպեսզի տաք օշարակը տաքացնի բանկայի պատերը, որից հետո լցրեք մնացած օշարակը:
Լցված բանկայի վրա դրեք  թիթեղյա կափարիչ,  և ստերիլիզացրեք այն մարմանդ կրակի վրա 10 րոպե: Այդ ամենից հետո նոր միայն  կափարիչը համապատասխան սարքով փակեք, բանկաները շրջեք, փաթաթեք  կտորով ու թողեք այդպես ամբողջ գիշեր:

4. Ելակի  ջեմ

Բաղադրիչները`

Շաքարավազի քանակությունը պետք է ելակի քանակությունից մի փոքր քիչ լինի:
Եփեք ջեմը այնքան, որ այն դառնա ցանկալի պնդությամբ զանգված, այդ պատճառով հստակ ժամանակահատված չի նշվում, դա կարող է լինել   30 րոպեից  2 ժամ:

Պատրաստման եղանակը՝

Ելակը մանրակրկիտ լվացեք, առանձնացրեք պոչերը և ելակը լցրեք հարիչի մեջ: Հարիչով  հատապտուղները վերածեք խյուսի, ավելացրեք շաքարավազն ու  խառնեք: Մարմանդ կրակի վրա այդ խյուսը եփեք այնքան, որ այն դառնա ձեզ համար  ցանկալի խտության ու գույնի ջեմ:

5. Ձմռան համար ելակով դոնդող

Ելակի դոնդողը  ձմռանը ամենահամեղ աղանդերներից մեկն է: Այդ քաղցր, բուրումնավետ  աղանդերը կարող եք ավելացնել ինչպես սերուցքի, պաղպաղակի , կաթնաշոռի վրա, այնպես էլ համտեսել բուլկու  կամ մատուցել սիրելի  բլիթների հետ:

Դոնդողի  կայունությունը թույլ չի տալիս նրան  թուլանալ, որով էլ և այն տարբերվում է ելակի մուրաբայից:

Դոնդողի պատրաստման համար հարկավոր է ՝

• 1 կգ ելակ
• 1,5 կգ շաքարավազ
• 1,5 թ/գ կիտրոնաթթու

Պատրաստման եղանակը՝

Հատապտուղները մաքրեք, առանձնացրեք պոչերն ու  լվացեք: Լցրեք հատապտուղները կաթսայի մեջ ու վրան ավելացրեք  անհրաժեշտ շաքարավազի  կեսը( 750 գրամ ): Թողեք այդպես որոշ ժամանակ, որպեսզի հատապտուղների հյութը դուրս գա: Երբ ելակի հյութը դուրս կգա, ավելացրեք մնացած շաքարավազը, դրեք այն կրակի վրա ու եփեք այնքան, մինչև որ այն եռա: Եռալուց հետո եփեք ևս 15 րոպե` պարբերաբար խառնելով: Վրան առաջացած փրփուրը հավաքեք:

Պատրաստեք կիտրոնաթթվի լուծույթ: Վերցրեք մի փոքր ջուր ու 1 գդալ շաքարավազ,  պատրաստեք օշարակ, որի մեջ լցրեք կիտրոնաթթուն: Ստացված խառնուրդը լցրեք դոնդողի մեջ, խառնեք ու եփեք ևս 5 րոպե: Այդ ընթացքում շարունակ խառնեք այն փայտե գդալով:

Բանկաները ստերիլիզացրեք, որից հետո այնտեղ լցրեք տաք դոնդողն ու փակեք ստերելիզացված կափարիչներով: Բանկաները շրջեք ու նման դիրքով թողեք մինչև որ  այն սառչի:  Դոնդողը  պահեք սառը ու մութ տեղում:

6. Հում ելակի-ազնվամորու ջեմ

Բաղադրիչները`

• 2 բաժակ մանրացված ելակ
• 2,5 բաժակ մանրացված ազնվամորի
• 1/4 բաժակ կիտրոնի հյութ
• 4,5 բաժակ շաքարավազ
• 1 բաժակ շաքարի օշարակ
• 1 փաթեթ պեկտին

Պատրաստման եղանակը`

Լվացեք հատապտուղները, պոկեք ելակի պոչերը: Հարիչով  առանձին-առանձին մանրացրեք ու այնուհետև իր խառնեք հատապտուղները: Խառնուրդի մեջ ավելացրեք պեկտին ու մի փոքր կիտրոնի հյութ, լավ խառնեք այն, որպեսզի պեկտինը լուծվի խառնուրդի մեջ ու այդպես թողեք 30 րոպե: Այնուհետև  խառնուրդի մեջ լցրեք օշարակը, խառնեք, ավելացրեք շաքարավազն ու նորից խառնեք: Ստացված խառնուրդը լցրեք բանկանների մեջ: Սկզբում խառնուրդը թույլ կթվա, սակայն մեկ օր հետո այն կդառնա ջեմի նման: Հաջորդ օրը այն արդեն կարող եք համտեսել:  Այն հարկավոր է  պահել սառնարանում:

Բարի ախորժակ