Արաքս Կետիկյանը, Լուիզա Կարապետյանն ու Ասյա Հովսեփյանը երգով եւ բարեմաղթանքով շնորհավորեցին փոքրիկներին (տեսանյութ)

«Սիրո գերին» եւ «Ուրիշի հոգին» սերիալներից հայտնի դերասանուհիներ Արաքս Կետիկյանը, Լուիզա Կարապետյանը եւ Ասյա Հովսեփյանը NEWS.am-ի այս տարվա բարեգործական ակցիայի ժամանակ վաճառում էին ձողիկներ եւ իրենց ակտիվությամբ վարակում էին բոլոր հավաքվածներին:

90-ական թ-երին ծնված մի շարք երեխների պես նրանց մանկությունն էլ է եղել մի քիչ մութ, մի քիչ ցուրտ, սակայն աղջիկները փորձեցին վերհիշել մանկության տարիների միայն դրական ու քաղցր պահերը.

«Ունեցել եմ արկածային եւ անմոռանալի մանկություն, որի յուրքանչյուր պահը հիշելիս ցանկանում եմ նորից այնտեղ վերադառնալ: Չեմ կարող հստակ հիշել, թե ինչի մասին էի երազում փոքր տարիքում, սակայն կարող եմ ասել, որ այսօր երջանիկ եմ այն ամենով, ինչ ունեմ: Իսկ փոքրիկներին մաղթում եմ, որ երբեք չիմանան, թե ինչ է տխրությունը, չունենան կորուստներ, լինեն երջանիկ եւ միշտ ապրեն խաղաղ ու կապույտ երկնքի ներքո»,-ասում է Ասյան:

Արաքս Կետիկյանը ծնվել է Արցախում` պատերազմի շրջանում, սակայն իր իսկ խոսքով` ունեցել է ուրախ, գունեղ եւ կատարյալ երջանիկ մանկություն.

«Այդ ամենի համար մինչեւ կյանքիս վերջ պարտական եմ ծնողներիս: Դեռ չեմ դադարում երեխա մնալ, իսկ եթե մի օր ինձ այլեւս չզգամ երեխա, ուրեմն շատ դժբախտ մարդ կլինեմ»,-ասում է Արաքսը, որի ամենամեծ երազանքներից մեկն այն է, որ ոչ մի երեխա մանկատանը չհայտնվի.

«Ուզում եմ, որ բոլորը վերադառնան ընտանիք, որ նրանց աչքերը փայլեն երջանկությունից: Երեխաները մաքուր էակներ են. առանց նրանց մոլորակի լույսը կխամրի: Երեխաներին պետք է սիրել եւ ջերմացնել»:

Դերասանուհի Լուիզա Կարապետյանը եւս երազում է, որ մանկության հրաշք հեքիաթը երբեք չավարտվի.

«Ես դեռ հավատում եմ այդ հեքիաթին եւ ինձ մանուկ եմ զգում: Ժամերով կարող եմ երեխաների հետ խաղալ: Շատ եմ սիրում փոքրիկներին»,-ասում է Լուիզան, որը մանկության տարիներին բավականին հանգիստ երեխա է եղել.

«Ժամերով փակվում էի սենյակումս եւ տիկնիկներիս հետ էի խաղում: Հայելեւ առջեւ համերգներ էի կազմակերպում, իսկ տիկնիկներս հանդիսատեսս էին: Բեմի հանդեպ իմ սերը դեռեւս մանկությունից է գալիս: Ցանկանում էի մեծանալ եւ երգչուհի դառնալ»:

Դերասանուհին խոստովանում է` մինչ օրս դիտում է մուլտֆիլմեր եւ բաց չի թողնում ոչ մի նորություն.

«Ցանկանում եմ, որ յուրաքանչհյուր աղջիկ իրեն միշտ արքյադուստր զգա եւ հավատով սպասի իր բարետես ասպետին»:

Երիտասարդ դերասանուհիները չսահմանափակվեցին միայն բարեմաղթանքով: Նրանք նաեւ իրենց ուրախ երգով շնորհավորեցին փոքրիկների տոնը: Արաքսի, Ասյայի եւ Լուիզայի աշխույժ կատարմանը կարող եք հետեւել տեսանյությում`

Հիշեցնենք, որ մայիսի 29-ին` Հյուսիսային պողոտայում կայացած NEWS.am-ի ամենամյա բարեգործական ակցիայի շրջանակներում ստացված հասույթն այս տարի ամբողջությամբ կհատկացվի ապրիլին Արցախում զոհված զինծառայողների սոցիալապես անապահով ընտանիքներին, որոնցում կան երեխաներ:

Ընդհանուր առմամբ, հանգանակվել է 2մլն 450 հազար դրամ:

Սյունե Առաքելյան

Լուսանկարները` Արսեն Սարգսյանի

NEWS.am STYLE