Ինչպե՞ս են նշում Երեխաների պաշտպանության միջազգային օրը տարբեր երկրներում (լուսանկարներ)

Operativ.am-ը գրում է.

Երեխաների պաշտպանության օրը նշվում է 1950 թ-ից Կանանց միջազգային ժողովրդավարական ասոցիացիայի նախաձեռնությամբ: ՄԱԿ-ը պաշտպանեց այդ նախաձեռնությունը և համագործակցեց այն տարածելու համար` անվանելով այդ օրը երեխաների իրավունքների պաշտպանության օր և դարձնելով երեխաների կյանքի և առողջության պաշտպանությունը իր առաջնահերթ ուղղություններից մեկը:

Երեխաների իրավունքների պաշտպանության միջազգային օրը նշվում է հունիսի 1-ին, սակայն տարբեր երկրներ յուրովի և տարբեր օրերի են նշում այն:

Հայաստանում Երեխաների պաշտպանության օրը նշվում է հենց հունիսի 1-ին` ամռան առաջին օրը: Այս օրը բոլոր երեխաների համար յուրահատուկ տոն է: Ամենուր կազմակերպվում են ուրախ միջոցառումներ, համերգներ, խաղեր, կրկեսային ներկայացումներ: Երեխաների համար օրը կարծես հեքիաթի է վերածվում:

Ռուսաստանում Երեխաների պաշտպանության օրը նշում են հունիսի 1-ին: Այդ օրը ռուս երեխաների համար ուրախ միջոցառումներ են կազմակերպում. երգում, պարում են դպրոցներում, մանկապարտեզներում, իսկ այգիներում՝ տոնական միջոցառումներ են կազմակերպվում:

Ճապոնիայում Երեխաների պաշտպանության օրը նշում են տարին երեք անգամ: Մարտի 3-ին նշում են Աղջիկների օրը: Այն նախատեսված է միայն փոքր աղջիկների համար: Ամեն տարի այդ օրն աղջիկների մայրիկները տանը գեղեցիկ մանկական տիկներիկների ցուցադրություն են կազմակերպում, ապա դրանք նվիրում իրենց դուստրերին:

Մայիսի 5-ին նշում են Տղաների օրը: Այդ օրը, բոլոր այն ընտանիքները, որտեղ կան տղա երեխաներ, իրենց դռնից կախում են ձկան պատկերով դրոշ, որը համարվում է հաջողության և ուժի խորհրդանիշ: Եթե տանը կան շատ տղաներ, ապա կախում են կանաչ-երկնագույն դրոշներ: Նման դրոշների մեծ քանակությունը վկայում է, որ տանը շատ տղաներ կան:

Եվ նոյեմբերի 15-ին Ճապոնիայում նշում են Երեխաների օրը, որը կոչվում է «Յոթ-հինգ-երեք»: Ճապոնական ավանդույթների համաձայն, 3-ը, 5-ը, 7-ը մանկության ամենաերջանիկ տարիքներն են: Այդ պատճառով էլ ամեն տարի այս տարիքի երեխաները ուրախ տոնում են իրենց տոնը:

Հարավային Կորեայում այս տոնը գալիս է դեռևս 1923 թ-ից: Այն, ի սկզբանե, եղել է տղաների համար: Երեխաների պաշտպանության օրը Կորեայի Հանրապետությունում համազգային տոն է: Այն նշվում է ամեն տարի մայիսի 5-ին: Այս օրը բոլորը երեխաներն ուրախ են և երջանիկ, ծնողները նրանց տալիս են ամենացանկալի նվերները: Երեխաների մեծ մասը նաև այդ օրը կորեական ազգային հագուստ է հագնում:

Կոլումբիայում ամեն տարի հուլիսի 4-ին նշում են Երեխաների պաշտպանության օրը: Այս օրը երկրի տարբեր դպրոցներում բազմազան միջոցառումներ են լինում: Երեխաները սովորաբար տարբեր դիմակներ են կրում, հագնվում են ծաղրածուների նման և քայլում փողոցներով: Ամենուր ուրախ տրամադրություն է տիրում:

Բրազիլիայում տոնը նշում են օգոստոսի 15-ին: Այդ օրը նաև Համաճարակների դեմ պայքարի ազգային օրն է: Այդ պատճառով էլ ամեն տարի այդ օրը բժիշկները հետազոտում են բոլոր երեխաներին` դրանով ընդգծելով երեխաների առողջությանը տրվող մեծ կարևորությունը:

Շվեդիայում ևս նշում են Աղջիկների տոն և Տղաների տոն: Օգոստոսի 7-ին Շվեդիայում նշվում է Տղաների օրը, որն անվանում են նաև Խեցգետնի տոն: Տոնը նման անվանում է ստացել, որպեսզի տղաները խեցգետնի նման ուժեղ լինեն: Այդ օրը երեխաները հագնում են խեցգետնի պատկերով հագուստներ, ուրախ և ծիծաղաշարժ ելույթներ են ունենում: 

Իսկ դեկտեմբերի 13-ին Շվեդիայում նշում են Աղջիկների օրը, որը նաև անվանում են Լյուսիա աստվածուհու տոն: Լյուսիան աստվածուհի է եղել, ով, ըստ շվեդական ավանդազրույցների, պաշտպանում է աղջիկներին: Ամեն տարի այդ օրը աղջիկները վերածվում են փոքրիկ աստվածուհիների, որոնք բարի գործեր են անում և օգնում մյուս երեխաներին:

Իսլամական երկրների մեծամասնությունում պասի 14-րդ օրը նշվում է «Կոնֆետի օրը», որը երեխաների համար ամենաուրախ օրն է: 

Արևմտյան Աֆրիկայի երկրներում կա հատուկ «մանկական կառնավալ», որը տևում է մի ամբողջ ամիս: Աֆրիկայի բնակիչները պատմականորեն սիրում են երգել և պարել: Մանկական կառնավալի ժամանակ` չնայած մարդկանց կենսապայմաններ տարբերությանը, բոլոր երեխաներն ուրախ և երջանիկ են: 

Իսպանիայում Երեխաների պաշտպանության օրը նշվում է հունվարի 5-ին:Այն իրականում կրոնական տոն է և իսպաներենից թարգմանվում է որպես «Կախարդանքի թագավորի տոն»: Սկսած հունվարի 5-ի երեկոյից մինչև հաջորդ օրվա առավոտն Իսպանիայում ամենուր կարելի է տեսնել մեքենաների շքերթներ, որտեղ «երեք թագավորները» երեխաներին բաժանում են տարբեր քաղցրավենիքներ: Երբ մեքենաների շքերթը հասնում է քաղաքային կամ շրջանային վարչական շենքի մոտ, այն երեխան, ով առաջինը կնստի «թագավորներից» մեկի մոտ` կստանա հատուկ նվեր, սակայն պետք է խոստանա, որ լավ և ջանասիրաբար կսովորի եկող տարում: