Թրամփը խոստացել է բանտ նստեցնել Քլինթոնին

Դեմոկրատներից ԱՄՆ-ի նախագահի պաշտոնի գլխավոր հավակնորդ Հիլարի Քլինթոնը պետք է բանտ նստի ծառայողական գրագրության կանոնների խախտման հետ կապված սկանդալի պատճառով: Այդ մասին, ինչպես տեղեկացնում է «Արմենպրես»-ը՝ հղում անելով The Hill հրատարակությանը, հունիսի 2-ին հայտարարել է նրա մրցակիցը՝ հանրապետականներից նախագահի պաշտոնի թեկնածու Դոն ալդ Թրամփը:

«Այն բանից հետո, ինչ նա այսօր իմ մասին ասաց իր ստահոդ ճառում… ես այպես կասեմ՝ Հիլարի Քլինթոնը պետք է բանտ նստի»,- հայտարարել է Թրամփը Սան-Խոսեում (Կալիֆոռնիայի նահանգ) կայացած հանրահավաքում:

«Ստախոս Հիլարիի վատ ներկայացումը»,- գրել է Թրամփը Twitter սոցիալական ցանցում, ընդսմին նշելով, որ Քլինթոնը «նախագահի տեսք չուներ»: Թրամփի կարծիքով՝ Քլինթոնը «մտադրվել էր ամբողջովին խեղաթյուրել» իմ արտաքին քաղաքական գերակայությունները:

Թրամփի կարծիքով՝ Քլինթոնը պաշտպանեց Իրանի հետո գործարքը, որպեսզի խուսափի բանտարկությունից: «Եթե անկեղծ լինենք, նա սոսկալի մեղավոր է: Այն փաստը, որ նրան թույլ տվեցին՝ մասնակցել այս նախընտրական արշավին, խայտառակություն է Միացյալ Նահանգների համար, խայտառակություն է մեր ազգի համար»,- հավելել է քաղաքական գործիչը:

Հունիսի 2-ին ավելի վաղ Քլինթոնը հայտարարել է, որ հանրապետական Դոնալդ Թրամփին ԱՄՆ-ի նախագահ ընտրելը «տոնի առիթ կդառնա Կրեմլում»: Նա վստահություն է հայտնել, որ Թրամփն ի վիճակի չէ լինել նախագահ, իսկ նրա գաղափարները «վտանգավոր են»: «Նա բարոյապես պիտանի չէ այդ պաշտոնի համար, որը պահանջում է գիտելիքներ, ինքնատիրապետում եւ հսկայական պատասխանատվություն»,- նշել է ԱՄՆ-ի նախկին պետքարտուղարը:

Անդրադառնալով իր արտաքին քաղաքական հայացքներին՝ նա ասել է, թե հանդես է գալիս Ռուսաստանի եւ Չինաստանի նկատմամբ «խիստ, բայց մտածված մոտեցման» օգտին, նշելով, որ այդ երկրների ղեկավարների հետ շփվելու փորձ ունի: