Էրդողանն առաջարկել է Բունդեսթագում թուրք պատգամավորների արյունը փորձաքննության ենթարկել

 Թուրքիայի նախագահ Ռեջեփ Թայիփ Էրդողանը չի դադարում տարբեր հարթակներից ելույթների ժամանակ դատապարտել Գերմանիային Հայոց ցեղասպանությունը ճանաչելու հարցում: Ինչպես հաղորդում է «Արմենպրես»-ը` վկայակոչելով թուրքական «Անադոլու» գործակալությունը, այս անգամ նա խնդրի մասին խոսել է Սաբահաթթին Զաիմ համալսարանի ավարտական արարողության ժամանակ:

«Հե~յ, Գերմանիա, տես, նորից եմ ասում` նախ և առաջ Հոլոքոստի, Նամիբիայում շուրջ 100 հազար նամիբիացու սպանելու, ոչնչացնելու հաշիվը կտաս»,- ասել է Էրդողանը` նշելով, թե Գերմանիան ամենաքիչն իրավունք ուներ խորհրդարանում Հայոց ցեղասպանության շուրջ քվեարկություն կազմակերպելու:

Թուրքիայի նախագահը կրկին հիշեցրել է իր երկրում շուրջ 100 հազար հայի գտնվելու փաստի մասին` նշելով, թե բոլորին «Հայաստան կուղարկեին, եթե հայերի թշնամին լինեին»:

Էրդողանը հրավիրել է ուսումնասիրելու թուրքական արխիվները և միայն դրանից հետո իրենց դեմ մեղադրանքներ ներկայացնելու:

Նա անդրադարձել է նաև Բունդեսթագում Հայոց ցեղասպանության բանաձևն ազգությամբ թուրքերի կողմից պատրաստելու փաստին`ասելով. «Ի՞նչ թուրք: Նրանց արյունը պետք է լաբորատորիական փորձաքննության ենթարկել»:

Գերմանիայի Բունդեսթագը հունիսի 2-ին ընդունեց Հայոց ցեղասպանության ճանաչման բանաձևը, որն ունի «1915 և 1916թվականներին հայերի և մյուս քրիստոնյա փոքրամասնությունների ցեղասպանության հիշատակի և ոգեկոչման մասին»անվանումը: Բանաձևն ընդունվեց ունենալով ընդամենը մեկ դեմ, մեկ ձեռնպահ ձայն: Ելույթ ունեցողները միաձայնընդգծում էին անցյալի հետ առերեսման անհրաժեշտությունը, նաև` Հայաստանի և Թուրքիայի հաշտեցման գործընթացին նպաստելու մղումները: Բունդեսթագում բարձրաձայնվել է Օսմանյան Թուրքիայիոճրագործության մասին` նշելով, որ Գերմանիայի քայլը ոչ թե հայց է և մեղադրանք, < i>այլ խոնարհում զոհերի հիշատակի առջև: