Իսպանիայում շտապօգնություն են կանգնեցրել 50 կգ մարիխուանայով

ՄԻՋԱԶԳԱՅԻՆ 7 Հունիս, 2016 0:36

Իսպանիայում Քաղաքացիական գվարդիայի գրոհայինները շտապօգնության մեքենա են կանգնեցրել, որում 50 կգ մարիխուանա է եղել, հայտնում է Lenta-ն` վկայակոչելով El Mundo-ին:

Թմրանյութի առեւտրականներին որսալու գործողությունը անանուն զանգի արդյունք է դարձել. մարդը, որը ներկայացել է որպես ֆերմեր Մադրիդի շրջակայքից, հայտնել է, որ հարեւան ֆերմայում ինչ-որ կասկածելի մարդիկ են թափառում եւ կարմիր խաչերով բեռնատար են կանգնեցրել, որի մեջ անհասկանալի փաթեթներ են բեռնում: Տեղ հասած ոստիկանությունը նկատել է շտապօգնության մեքենան բելգիական համարներով եւ գաղտնի հետեւել է ֆերմային:

Երբ մի քանի ժամ անց շտապօգնությունը դուրս է եկել դարպասից, ոստիկանները վարորդին հրահանգել են կանգ առնել: Երբ նա բացել է մեքենայի դռները, օրենքի պահապանները կանեփի ուժեղ հոտ են առել: Խուզարկության ընթացքում պարզվել է, որ բժշկական օգնություն տրամադրելու համար բոլոր սարքավորումներն ունեցող մեքենան նաեւ կրկնակի առաստաղ է ունեցել, որի գաղտնարանում թմրանյութ է պահվել ընդհանուր մոտ 60 հազար եվրո արժողությամբ:

Ձերբակալվել է վարորդը` Բրյուսելում ապրող 28-ամյա մարոկկացին Մուհամմեդ անունով եւ դոմինիկացի 26-ամյա Անտոնիոն, որին պատկանում է ֆերման: Քննիչներն արդեն հայտնել են, որ թմրանյութի վաճառականների ավազակախումբը ստեղծվել էր մոտ կես տարի առաջ եւ այժմ փորձում են պարզել, թե որտեղից է մարիխուանա ներմուծել Իսպանիա: