Ադրբեջանի հանրային հեռուստատեսությունում զանգվածային կրճատումներ են. փող չկա

Ադրբեջանի հանրային հեռուստատեսությունում աշխատանքից զանգվածային ազատումներ են կատարվում:

Վկայակոչելով «Թուրան» լրատվական գործակալությունը, հունիսի 1-ից աշխատանքից ազատել են տեղեկատվական վարչության տնօրենին, Թուրքիայում երկու թղթակիցներին, Կենտրոնական Ասիայի գծով երկու թղթակիցներին, երկու ավագ խմբագիրներին, երկու թղթակցի, ռուսերեն հաղորդումների հաղորդավարին, քաղաքական վերլուծաբանին:

Այս մասին ասվում է Հանրային հեռուստատեսությունում կադրային քաղաքականությունից դժգոհ լրագրողների անունից սոցցանցերում տարածված հաղորդագրության մեջ, որտեղ նշվում է, որ աշխատանքից ազատումների մասին որոշումն ընդունվել է հեռուստատեսության գլխավոր տնօրենի՝ երկրից բացակայելու ժամանակ: 

Նշվում է նաեւ որոշ ազատումների ապօրինությունը, քանի որ վարչությունների ղեկավարներին կարող է աշխատանքից ազատել միայն հեռուստատեսության հեռարձակման խորհուրդը, այլ ոչ թե գլխավոր տնօրենը:

Ասվում է, որ մինչեւ շաբաթվա վերջ աշխատանքից կազատեն եւս 7-8 աշխատակցի:

Ադրբեջանի հանրային հեռուստատեսությունը չի մեկնաբանել իրադարձությունը:

«Թուրան»-ը հայտնում է, որ վերջին ամիսներին աշխատանքից ազատումների եւ աշխատավարձերի կրճատումների ալիքը դիպել է բոլոր իշխանամետ ԶԼՄ-ներին եւ հեռուստաալիքներին: Բացի այդ, աշխատանքը դադարեցրել են օլիգարխների, բարձրաստիճան պետչինովնիկների եւ ուրիշների կողմից ֆինանսավորվող մի քանի կայքեր եւ տպագիր հրատարակություններ: