Չեխ գործարարները Հայաստանում փնտրում են գործընկերներ համատեղ բիզնես հիմնելու համար

 Չեխ գործարարներն ու նրանց միավորող կառույցները Հայաստանում են ոչ միայն առևտրաշրջանառությունն ավելացնելու, Հայաստանի միջոցով ԵԱՏՄ տարածք ու Իրան դուրս գալու հնարավորությունները քննարկելու, այլև համատեղ ձեռնարկություններ հիմնելու հարցեր բարձրացնելու համար: Հայաստան-Չեխիա գործարար համաժողովի բացմանը հայտարարեց Չեխիայի Հանրապետության ԱՊՀ երկրների առևտրի պալատի նախագահ Ֆրանտիշեկ Մասոպուստը: «Մենք պետք է ձգտենք ավելացնել առևտրաշրջանառությունը մեր երկրների միջև, քանի որ շատ կարևոր է չեխ գործարարների համար օգտվել Հայաստանի հնարավորություններից` ներառյալ մուտքը Եվրասիական տնտեսական միության տարածք: Մենք այստեղ ենք գտնելու գործընկերներ, բայց ոչ միայն վաճառելու ու գնելու համար, այլ որպեսզի աշխատենք միասին, ձգտենք այստեղ բացել մեր բիզնեսը ու դուրս գանք Իրան ու այլ երկրներ»,-ասաց չեխ պաշտոնյան:

Նա շեշտեց, որ իրենց համար կարևոր է ԱՊՀ տարածքում հուսալի ու բարեխիղճ գործընկերոջ առկայությունը և հավելեց, որ այդ առումով ճիշտ երկիր են եկել: «Մենք պատմականորեն ունենք լավ հարաբերություններ, որի վկայությունն էլ մեր քաղաքական հարաբերությունների մակարդակն է»,-նշեց Ֆրանտիշեկ Մասոպուստը:

Նրա խոսքով` տարվա սկզբին, երբ Հայաստանում էին, ինքն ասել է, որ վերադառնալու են ու այսօր ուրախ է, որ այստեղ են ոչ միայն գործարարները, այլ հանդիպում են նաև երկրների նախագահները: «Ուրախ եմ, որ մեր նախագահներն այսօր հանդիպում են: Մեր երկրների միջև հարաբերությունները այնքան լավ են, որ կասկած չկա, որ պատրաստ ենք զարգացնել մեր համագործակցությունը: Երբ խոսում ենք համագործակցության մասին, նկատի ունենք փոխշահավետ հարաբերություններ»,-ասաց Ֆրանտիշեկ Մասոպուստը` իր հերթին հայ գործընկերներին հրավիրելով Չեխիա գործակցությունն ընդլայնելու համար: